ENGLISH
FRENCH
中文
ARABAKP ភ្នំពេញ ថ្ងៃទី១៨ ខែសីហា ឆ្នាំ២០២៦--អង្គភាពប្រឆាំងអំពើពុករលួយ(ACU )និងអង្គការតម្លាភាពកម្ពុជា TIC វិទ្យាស្ថានតស៊ូមតិ និងគោលនយោបាយ (API), ខេមបូចា (CamboJA), និងអង្គការសម្ព័ន្ធភាពដៃគូរដើម្បីអភិវឌ្ឍន៍តាមបែបប្រជាធិបតេយ្យ (PDP-Center)បានជួបពិភាក្សា និងស្វែងយល់លើការប្រឆាំងអំពើពុករលួយនៅកម្ពុជា។
អង្គភាពប្រឆាំងអំពើពុករលួយបានចាត់ទុកថា ការប្រយុទ្ធប្រឆាំងអំពើពុករលួយមិនអាចសម្រេចបានដោយស្ថាប័នមួយតែឯងឡើយ តែត្រូវការទាំងច្បាប់ ស្ថាប័ន ការអនុវត្តន៍ និងសំខាន់បំផុត គឺការចូលរួមរបស់សង្គម។ក្នុងន័យនេះហើយ ទើបមានជំនួបមួយ រវាង អង្គភាពប្រឆាំងអំពើពុករលួយ ជាមួយនាយិកា និង នាយកប្រតិបត្តិអង្គការមិនមែនរដ្ឋាភិបាលចំនួន៤ ដែលធ្វើការលើវិស័យតម្លាភាព អភិបាលកិច្ច គោលនយោបាយ និងលទ្ធិប្រជាធិបតេយ្យ។ ជំនួបនេះ មិនមែនគ្រាន់តែជាការជួបសម្ដែងការគួរសមទេ ប៉ុន្តែជាវេទិកានៃការបើកចំហ ផ្លាស់ប្តូរបទពិសោធ និងស្វែងរកចំណុចរួមសម្រាប់ការងារ ការប្រយុទ្ធប្រឆាំងអំពើពុករលួយ ជាពិសេស ការអប់រំ បង្កាទប់ស្កាត់ ហើយចូលលម្អិតទៅក្នុងការងារលទ្ធកម្មនៅថ្នាក់ក្រោមជាតិ។
អង្គភាពប្រឆាំងអំពើពុករលួយបានឱ្យដឹងនៅថ្ងៃទី ១៨ ខែ សីហា ឆ្នាំ ២០២៦នេះថា មុនកិច្ចពិភាក្សា ប្រធាន អ.ប.ព. បាននាំប្រតិភូទស្សនាផ្នែកមួយចំនួនរបស់ អបព ដូចជាបន្ទប់វិភាគពាក្យប្តឹង បន្ទប់ឃាត់ខ្លួន បន្ទប់ស្តាប់ចម្លើយ បន្ទប់រក្សាឯកសារប្រកាសទ្រព្យសម្បត្តិ និងបំណុល។
ក្នុងកិច្ចពិភាក្សា អង្គការទាំង៤ បានស្វែងយល់អំពីរចនាសម្ព័ន្ធ និងយន្តការប្រឆាំងអំពើពុករលួយរបស់ អ ង្គភាពប្រឆាំងអំពើពុករលួយដែលគ្របដណ្តប់គ្រប់រូបភាព គ្រប់វិស័យ និងគ្រប់ជាន់ថ្នាក់ តាមរយៈ ការអប់រំ ការបង្ការ ការទប់ស្កាត់ និងការអនុវត្តច្បាប់បង្ក្រាបបទល្មើសដោយគ្មានការរើសអើង ជាពិសេស ការទទួល និងដោះស្រាយបណ្តឹង ត្រូវបានផ្តោតការយកចិត្តទុកដាក់យ៉ាងខ្លាំង។ ពាក្យប្តឹងមួយ មិនមែនគ្រាន់តែជាក្រដាសមួយសន្លឹកចូលអង្គភាពទេ ប៉ុន្តែជាសក្ខីកម្មនៃការចាប់ផ្តើមស្វែងរកការពិត វិភាគដោយវិជ្ជាជីវៈ និងការដោះស្រាយតាមច្បាប់ គឺជាផ្នែកមួយនៃការកសាងទំនុកចិត្តរបស់សាធារណជនចំពោះស្ថាប័នប្រឆាំងអំពើពុករលួយ។ជាមួយគ្នានេះអង្គភាពប្រឆាំងអំពើពុករលួយ ក៏បានចែករំលែកបទពិសោធកន្លងមកយ៉ាងពិស្តាក្នុងការការពារសាក្សី ការពារអ្នករាយការណ៍ កាពារប្រភព ផងដែរ។
ចំណុចសំខាន់មួយទៀត គឺកិច្ចប្រជុំ អង្គភាពប្រឆាំងអំពើពុករលួយ និងអង្គការសង្គមស៊ីវិលទាំ៤ បានឈានពី «ការផ្លាស់ប្តូរយោបល់» ទៅ «កិច្ចសហការជាក់ស្តែង»។ លោកស្រី ស៊ិន ពុទ្ធារី នាយិកាប្រតិបត្តិ អង្គការតម្លាភាពកម្ពុជា និងលោក ឡាំ សុជាតិ នាយកប្រតិបត្តិ អង្គការវិទ្យាស្ថានតស៊ូមតិ និងគោលនយោបាយ លោក ណុប វី នាយក ខេមបូចា (CamboJA), និងលោក សុន ប៉ែន នាយកអង្គការសម្ព័ន្ធភាពដៃគូរដើម្បីអភិវឌ្ឍន៍តាមបែបប្រជា ធិបតេយ្យ (PDP-Center) បានស្នើសុំកិច្ចសហការដោយផ្ទាល់ជាមួយ អង្គភាពប្រឆាំងអំពើពុករលួយ លើនីតិវិធីការងារ ដើម្បីរួមចំណែកពង្រឹងតម្លាភាព និងសុចរិតភាព ជាពិសេសនៅថ្នាក់មូលដ្ឋាន និងក្នុងវិស័យលទ្ធកម្ម។ នេះជាសញ្ញាដ៏មានន័យ ព្រោះ ការប្រឆាំងអំពើពុករលួយ មិនមែនជាកិច្ចការរបស់អ្នកអនុវត្តច្បាប់តែប៉ុណ្ណោះទេ ប៉ុន្តែជារបៀបវារៈរួមរបស់ស្ថាប័នរដ្ឋ សង្គមស៊ីវិល និងប្រជាពលរដ្ឋ។
អង្គភាពប្រឆាំងអំពើពុករលួយបានចាត់ទុកថា ក្នុងជំនួបនាថ្ងៃទី១៧ ខែសីហា ឆ្នាំ២០២៦ មិនមែនគ្រាន់តែជាកំណត់ត្រានៃកិច្ចប្រជុំមួយព្រឹកទេ វាជាសារមួយថា៖ «នៅពេលស្ថាប័នរដ្ឋ និងសង្គមស៊ីវិលអាចអង្គុយជុំវិញតុតែមួយ និយាយដោយត្រង់ ស្តាប់គ្នាដោយបើកចិត្ត និងស្វែងរកវិធីធ្វើការជាមួយគ្នា-តម្លាភាពនឹងមិននៅត្រឹមជាពាក្យស្លោកទៀតឡើយ។ វាអាចក្លាយជាវប្បធម៌នៃការអនុវត្តន៍» ៕
ដោយ មករា
