គ.ជ.ប រៀបចំកិច្ចប្រជុំពិគ្រោះយោបល់លើសេចក្តីព្រាងបទបញ្ជានិងនីតិវិធីសម្រាប់ ការបោះឆ្នោតជ្រើសរើសក្រុមប្រឹក្សាឃុំ សង្កាត់

AKP ភ្នំពេញ ថ្ងៃទី៣១ ខែសីហា ឆ្នាំ២០២៦--គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំកិច្ចប្រជុំពិគ្រោះយោបល់លើសេចក្តីព្រាងបទបញ្ជានិងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ (ប.ន. ឃ. ស) នាព្រឹកថ្ងៃទី៣១ ខែសីហាឆ្នាំ២០២៦ នៅទីស្តីការ គ.ជ.ប ដោយមានការអញ្ជើញចូលរួមដោយផ្ទាល់ពីមន្ត្រីទីស្ដីការគ.ជ.ប និងតំណាងភាគីពាក់ព័ន្ធនឹងការបោះឆ្នោត រួមមានតំណាងក្រសួង ស្ថាប័នរដ្ឋតំណាងគណបក្សនយោបាយ តំណាងសមាគម អង្គការមិនមែនរដ្ឋាភិបាល និងលេខាធិការដ្ឋានរាជធានីខេត្តរៀបចំការបោះឆ្នោត សរុបចំនួន ១២៩នាក់និងតាមវីដេអូសន្និសីទចំនួនប្រមាណ១០០នាក់។

ឯកឧត្តម ហ៊ឺ រ៉ុង អគ្គលេខាធិការរង គ.ជ.បបានជម្រាបជូនថា កិច្ចប្រជុំពិគ្រោះយោបល់នេះធ្វើឡើងក្នុងគោលបំណងផ្លាស់ប្តូរយោបល់ជាមួយភាគីពាក់ព័ន្ធដែលបានផ្ញើយោល់លើសេចក្តីព្រាង ប.ន.ឃ.ស ត្រឡប់មក គ.ជ.ប វិញ និងប្រមូលយោបល់បន្ថែមទៀត ដើម្បីកែលម្អបទបញ្ជា និងនីតិវិធីនេះឱ្យកាន់តែមានលក្ខណៈពេញលេញ ងាយយល់ និងងាយអនុវត្ត ឆ្លើយតបទៅនឹងបរិបទ និងការវិវឌ្ឍថ្មីៗ ព្រមទាំងមានអនុលោមភាពតាមច្បាប់ និងលិខិតបទដ្ឋានគតិយុត្តផ្សេងទៀតជាធរមាន មុននឹង គ.ជ.បដាក់ឱ្យប្រើជាផ្លូវការ។ ឯកឧត្ដមបានបន្តថា សេចក្តីព្រាង ប.ន.ឃ.ស នេះត្រូវបានរៀបចំជាជំហានដំបូងដោយអគ្គលេខាធិការដ្ឋានគ.ជ.បនិងបានដាក់ឆ្លង គ.ជ.ប ពិនិត្យ និងសម្រេចជាគោលការណ៍បន្ទាប់មកបានបញ្ជូនទៅភាគីពាក់ព័ន្ធទាំងអស់ជួយពិនិត្យនិងផ្ដល់អនុសាសន៍កែលម្អជាលាយលក្ខណ៍អក្សរ។

ក្នុងឱកាសនោះ ឯកឧត្តម ទេព នីថា អគ្គលេខាធិការ គ.ជ.ប បានសម្តែងនូវការកោតសរសើរនិងវាយតម្លៃខ្ពស់ចំពោះថ្នាក់ដឹកនាំនិងមន្ត្រីជំនាញនៃអគ្គលេខាធិការដ្ឋាន គ.ជ.ប ដែលបានយកចិត្តទុកដាក់និងខិតខំប្រឹងប្រែងអស់ពីកម្លាំងកាយចិត្តក្នុងការផ្ដួចផ្ដើមរៀបចំកែសម្រួលសេចក្តីព្រាងបទបញ្ជានិងនីតិវិធីនេះមុននឹងបញ្ជូនសេចក្តីព្រាងនេះទៅភាគីពាក់ព័ន្ធទាំងអស់ដើម្បីជួយពិនិត្យនិងផ្តល់យោបល់បន្ថែម។

ឯកឧត្តមអគ្គលេខាធិការ គ.ជ.ប ក៏បានថ្លែងអំណរគុណផងដែរជូនចំពោះភាគីពាក់ព័ន្ធទាំងអស់ រួមមានក្រសួងស្ថាប័នគណបក្សនយោបាយ សមាគមអង្គការមិនមែនរដ្ឋាភិបាល និងលេខាធិការដ្ឋានរាជធានីខេត្តរៀបចំការបោះឆ្នោតទាំង២៥ដែលបានពិនិត្យនិងផ្តល់យោបល់ជាលាយលក្ខណ៍អក្សរត្រឡប់មក គ.ជ.ប វិញ ហើយការចូលរួមរបស់ភាគីពាក់ព័ន្ធគឺបង្ហាញពីតម្លាភាពសុក្រឹតភាពនិងគុណភាព ក្នុងការរៀបចំសេចក្តីព្រាងបទបញ្ជានិងនីតិវិធីនេះឱ្យកាន់តែល្អប្រសើរ។

គួរបញ្ជាក់ដែរថា ប.ន.ឃ.ស នេះគឺសម្រាប់ប្រើក្នុងការបោះឆ្នោតជ្រើសរើស ក្រុម ប្រឹក្សាឃុំ សង្កាត់អាណត្តិទី៦ ដែលនឹងប្រព្រឹត្តទៅនាថ្ងៃទី៦ ខែមិថុនា ឆ្នាំ២០២៧ និងអាណត្តិបន្តបន្ទាប់នៃក្រុមប្រឹក្សាឃុំ សង្កាត់តទៅ៕

ដោយ៖ ជឹម ណារី