​លោក អឺដូហ្គែន មើលឃើញនូវសក្តានុពលសម្រាប់ការជំរុញទំនាក់ទំនងជាមួយអង្គការសហប្រតិបត្តិការសៀងហៃ

AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៦ -- ប្រធានាធិបតីតួកគី លោក រេសេប តាយយីប អឺដូហ្គែន បានមានប្រសាសន៍កាលពីថ្ងៃពុធថា ប្រទេសតួកគីបើកចំហចំពោះការធ្វើឱ្យប្រសើរឡើងនូវទំនាក់ទំនងរបស់ខ្លួនជាមួយអង្គការសហប្រតិបត្តិការសៀងហៃ (SCO) បើទោះបីជានេះមិនមែនជាការផ្លាស់ប្តូរចេញពីលោកខាងលិចក៏ដោយ។

លោកប្រធានាធិបតី រេសេប តាយយីប​ អឺដូហ្គែន បានមានប្រសាសន៍កាលពីថ្ងៃពុធថា «តាមទស្សនៈរបស់យើង វាពិតជាអាចទៅរួចក្នុងការនាំយកទំនាក់ទំនងជាមួយអង្គការសហប្រតិបត្តិការសៀងហៃទៅកាន់កម្រិតខ្ពស់ជាងនេះនាពេលអនាគតដ៏ខ្លីខាងមុខ។ ខ្ញុំក៏ចង់សង្កត់ធ្ងន់ទៅលើចំណុចខាងក្រោមជាពិសេសផងដែរ។ ការរំពឹងទុកនៃសមាជិកភាពរបស់តួកគីនៅក្នុងអង្គការនេះ មិនមានន័យថាជាការបំបែកចេញពីប្លុកណាមួយ ឬងាកចេញពីលោកខាងលិចឡើយ។ គោលដៅរបស់យើង គឺពង្រឹងឥទ្ធិពលរបស់យើងផ្ទាល់ ដោយដឹកនាំដោយចក្ខុវិស័យដ៏ទូលំទូលាយ»។

លោកប្រធានាធិបតីបានកត់សម្គាល់ថា ប្រទេសតួកគីរក្សាទំនាក់ទំនងពាណិជ្ជកម្ម និងសេដ្ឋកិច្ចទ្វេភាគីជាមួយប្រទេសជាសមាជិកនៃអង្គការសហប្រតិបត្តិការសៀងហៃ។

លោក អឺដូហ្គែន បានកត់សម្គាល់ថា លោកបានពិភាក្សាអំពីបញ្ហាទាំងអស់ដែលគ្របដណ្តប់លើទំនាក់ទំនងទ្វេភាគីជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន នៅទីក្រុងប៊ីសខេក ។

នៅពេលដែលអ្នកសារព័ត៌មានសួរថា តើបញ្ហាអនាគតនៃប្រព័ន្ធការពារដែនអាកាស S-400 របស់រុស្ស៊ីនៅទីក្រុងតួកគី ត្រូវបានពិភាក្សានៅក្នុងកិច្ចប្រជុំនេះដែរឬទេ? លោក អឺដូហ្គែន បានមានប្រសាសន៍ថា «យើងបានពិភាក្សាជាមួយលោក ពូទីន អំពីបញ្ហាទាំងអស់នៅក្នុងរបៀបវារៈនៃទំនាក់ទំនងទ្វេភាគីរបស់យើង»។

ប្រធានាធិបតីតួកគីក៏បានគូសបញ្ជាក់ផងដែរអំពីតម្រូវការក្នុងការបង្កើតយន្តការសម្រាប់ការធ្វើនាវាចរណ៍ដោយសុវត្ថិភាពនៅសមុទ្រខ្មៅ ដោយលោកបានបន្ថែមថា ទីក្រុងអង់ការ៉ាមានការព្រួយបារម្ភអំពីវិបត្តិស្បៀងអាហារ ដែលកំពុងកើតឡើងនៅទ្វីបអាហ្វ្រិកដោយសារតែស្ថានភាពលំបាកនៅក្នុងតំបន់ ហើយលោកជឿជាក់ថា ជំហានដ៏សកម្ម គឺជាតម្រូវការចាំបាច់។

លោក អឺដូហ្គែន បានពិពណ៌នាអំពីកិច្ចពិភាក្សារបស់លោកជាមួយលោក ពូទីន នៅទីក្រុងប៊ីសខេកថា មានផលិតភាព ដោយកត់សម្គាល់ថា ប្រធានបទអ៊ុយក្រែនត្រូវបានលើកឡើងក្នុងអំឡុងពេលនៃកិច្ចសន្ទនា។

មេដឹកនាំតួកគីរូបនេះបានបន្ថែមថា លោកបានសម្តែងការត្រៀមខ្លួនរបស់ទីក្រុងអង់ការ៉ាក្នុងការជួយសម្រាប់ការឈានដល់ដំណោះស្រាយសន្តិភាពនៅក្នុងប្រទេសអ៊ុយក្រែន។

កាលពីពេលថ្មីៗនេះ ប្រធានាធិបតីរុស្ស៊ី និងតួកគី បានធ្វើកិច្ចចរចានៅខាងក្រៅកិច្ចប្រជុំកំពូលអង្គការសហប្រតិបត្តិការសៀងហៃ (SCO) នៅទីក្រុងប៊ីសខេក៕

ដោយ៖ យា ចិន្ដាខន្ដី (ប្រភព៖ ស្ពុតនីក)