ENGLISH
FRENCH
中文
ARABAKP ភ្នំពេញ ថ្ងៃទី២៩ ខែកញ្ញា ឆ្នាំ២០២៦ -- អាជ្ញាធរមូលដ្ឋានបានឱ្យដឹងកាលពីថ្ងៃអាទិត្យថា ការវាយប្រហារដោយយន្តហោះគ្មានមនុស្សបើក(drone) របស់រុស្ស៊ីមកលើរដ្ឋធានីគៀវ (Kyiv) របស់អ៊ុយក្រែន បានសម្លាប់មនុស្សយ៉ាងហោចណាស់ ៣នាក់ និងធ្វើឱ្យមនុស្សជាង ១០នាក់ផ្សេងទៀតរងរបួស។
យោងតាមការិយាល័យព្រះរាជអាជ្ញាតំបន់គៀវ បានឱ្យដឹងថាយន្តហោះគ្មានមនុស្សបើកមួយគ្រឿងបានវាយប្រហារទៅលើផ្សារមួយនៅក្នុងភូមិ Sofiivska Borshchahivka។
ការវាយប្រហារទាំងនេះក៏បានបង្កការខូចខាតដល់យានយន្ត និងបង្កជាអគ្គិភ័យនៅឃ្លាំងស្តុកទំនិញ និងអគារការិយាល័យមួយកន្លែងនៅក្នុងតំបន់នោះផងដែរ។
មុននេះ ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelenskyy) បានចោទប្រកាន់រុស្ស៊ីថាបានបញ្ជូនយន្តហោះគ្មានមនុស្សបើកសម្រាប់វាយប្រហារចំនួន ២៧៧គ្រឿងដែលមានប្រភេទផ្សេងៗគ្នា ចាប់តាំងពីថ្ងៃសៅរ៍មក ដោយលោកបានលើកឡើងថាការវាយប្រហារទាំងនោះបានបំផ្លាញហេដ្ឋារចនាសម្ព័ន្ធស៊ីវិល និងសាធារណៈនៅទូទាំងប្រទេសអ៊ុយក្រែន រួមទាំងអគារមួយដែលត្រូវបានប្រើប្រាស់ជាលំនៅដ្ឋានរបស់ឯកអគ្គរដ្ឋទូតអារ៉ាប៊ីសាអូឌីតផងដែរ។
នៅក្នុងសេចក្តីថ្លែងការណ៍មួយនៅលើបណ្តាញសង្គមអ៊ិចរបស់សហរដ្ឋអាមេរិក លោកបាននិយាយថា ការវាយប្រហារដោយយន្តហោះគ្មានមនុស្សបើករបស់រុស្ស៊ីមកលើទីក្រុងគៀវបានបំផ្លាញសាលាមត្តេយ្យសាលារៀន អគារលំនៅដ្ឋាន ហាងជួសជុលរថយន្ត ឃ្លាំងស្តុកទំនិញ និងហេដ្ឋារចនាសម្ព័ន្ធទូរគមនាគមន៍។
លោកបានមានប្រសាសន៍ថា៖ «រុស្ស៊ីគ្មានគោលដៅយោធាណាមួយឡើយក្នុងការធ្វើបែបនេះ វាគ្រាន់តែជាការប៉ុនប៉ងដើម្បីបំបាក់ស្មារតីប្រជាជន និងបង្កការខូចខាតឱ្យបានច្រើនបំផុតតាមដែលអាចធ្វើទៅបានដល់សង្គមរបស់យើងប៉ុណ្ណោះ»។
លោកបានបន្ថែមថា ការវាយប្រហារទាំងនោះក៏បានបំផ្លាញសាលាកីឡាមួយកន្លែងនៅទីក្រុងឌីនីប្រូ និងមណ្ឌលថែទាំកុមារមួយកន្លែងនៅក្នុងតំបន់ Sumy ផងដែរ៕
ដោយ៖ មូល មិនា (ប្រភព៖ AA-AKP)
