ផែនការថវិកាឆ្នាំ២០២៧ រួមបញ្ចូលនូវការរឹតបន្តឹងផ្នែកហិរញ្ញវត្ថុជាមួយនឹងវិធានការសង្គម និងវិនិយោគ

AKP ភ្នំពេញ ថ្ងៃទី២៩ ខែកញ្ញា ឆ្នាំ២០២៦ -- លោក កុនស្ទែនទីន ប្រូដាណូវប្រធានគណៈកម្មាធិការថវិកា និងហិរញ្ញវត្ថុសភា និងជាសមាជិកសភាមកពីគណបក្សប៊ុលហ្គារីជឿនលឿន បានមានប្រសាសន៍នៅក្នុងបទសម្ភាសន៍មួយតាមទូរទស្សន៍កាលពីពេលថ្មីៗនេះថា ថវិកាឆ្នាំ២០២៧ របស់ប្រទេសប៊ុលហ្គារី នឹងផ្តោតសំខាន់ទៅលើការបង្រួបបង្រួមសារពើពន្ធបន្តិចម្តងៗគោលនយោបាយសង្គម និងប្រាក់ចំណូល និងការកែលម្អបរិយាកាសវិនិយោគ។

លោក ប្រូដាណូវ បាននិយាយថា កិច្ចខិតខំប្រឹងប្រែងដើម្បីទប់ស្កាត់សេដ្ឋកិច្ចស្រមោលនឹងរួមបញ្ចូលនូវការណែនាំវិក្កយបត្រអេឡិចត្រូនិក និងការគ្រប់គ្រងកាន់តែតឹងរ៉ឹងទៅលើទំនិញដែលការបង្កហានិភ័យខ្ពស់នៃការគេចពន្ធ ដូចជាផ្លែឈើ និងបន្លែឆ្លងកាត់ព្រំដែនផ្ទៃក្នុងរបស់សហភាពអឺរ៉ុប។

លោកបានមានប្រសាសន៍ថា ផែនការនេះក៏រួមបញ្ចូលទាំងការបន្ធូរបន្ថយពន្ធសម្រាប់ឪពុកម្តាយដែលធ្វើការ អត្ថប្រយោជន៍កុមារប្រចាំខែខ្ពស់ជាងមុន និងមូលនិធិបន្ថែមសម្រាប់អត្ថប្រយោជន៍មាតុភាព។

លោក ប្រូដាណូវ បាននិយាយថា ការពិនិត្យមើលឡើងវិញនូវមុខងាររបស់ស្ថាប័នកំពុងដំណើរការនៅទូទាំងគ្រប់វិស័យទាំងអស់ ដើម្បីកំណត់ថាតើកំណែទម្រង់អ្វីខ្លះដែលប្រព័ន្ធនីមួយៗត្រូវការ និងរបៀបអនុវត្តវា។ លោកបានលើកឡើងអំពីកំណែទម្រង់រដ្ឋបាល ដោយលោកបានកត់សម្គាល់ថាច្បាប់គ្រប់គ្រងការរៀបចំរបស់ក្រសួងកំពុងត្រូវបានធ្វើវិសោធនកម្មដើម្បីលុបបំបាត់ភាពគ្មានប្រសិទ្ធភាព។

លោកបានមានប្រសាសន៍ថា នៅក្នុងវិស័យសុខាភិបាល ការធ្វើវិសោធនកម្មច្បាប់ ស្តីពីការលទ្ធកម្មសាធារណៈ នឹងនាំមកនូវការផ្លាស់ប្តូរសំខាន់ៗចំនួនពីរ។ មន្ទីរពេទ្យឯកជនដែលទទួលបានថវិកាសាធារណៈពីមូលនិធិធានារ៉ាប់រងសុខភាពជាតិ (NHIF) នឹងតម្រូវឱ្យរៀបចំការដេញថ្លៃសម្រាប់ការទិញឱសថ ខណៈដែលការដេញថ្លៃបែបមជ្ឈការនឹងត្រូវអនុវត្តចំពោះឱសថដែលមានតម្លៃខ្ពស់មួយចំនួន។ ចំពោះវិស័យអប់រំវិញ គំរូនៃការផ្តល់ហិរញ្ញប្បទាននឹងត្រូវពិនិត្យមើលឡើងវិញ ដើម្បីភ្ជាប់ការបែងចែកថវិកាទៅនឹងលទ្ធផលនៃការអប់រំជាក់ស្តែង ជាជាងផ្អែកលើចំនួនសិស្ស។

នៅពេលត្រូវបានសួរអំពីផែនការកែសម្រួលការវាយតម្លៃតម្លៃអចលនទ្រព្យសម្រាប់គណនាពន្ធ លោក ប្រូដាណូវ បានលើកឡើងថា តម្លៃទាំងនោះមិនត្រូវបានធ្វើបច្ចុប្បន្នភាពតាំងពីឆ្នាំ២០០៧ មកម្ល៉េះ ដែលធ្វើឱ្យរដ្ឋបាលក្រុងបាត់បង់ចំណូលដែលប្រមូលបានក្នុងមូលដ្ឋាន និងជំរុញឱ្យមានសេដ្ឋកិច្ចក្រៅប្រព័ន្ធ។ លោកបានបញ្ជាក់ថា តម្លៃនៃការវាយតម្លៃទាំងនេះនឹងកើនឡើងជាបណ្តើរៗ ដោយកម្រិតនៃការកើនឡើងជាក់លាក់នឹងត្រូវកំណត់តាមរយៈការគណនារបស់ក្រសួងហិរញ្ញវត្ថុ៕

ដោយ៖ យា ចិន្ដាខន្ដី (ប្រភព៖ BTA)