ទិវាផ្តល់ព័ត៌មាន ស្តីពីវិស័យអវកាសរបស់ប្រទេសប៊ុលហ្គារី នឹងប្រព្រឹត្តទៅនៅថ្ងៃទី៦-៧ ខែតុលា ឆ្នាំ២០២៦

AKP ភ្នំពេញ ថ្ងៃទី២៩ ខែកញ្ញា ឆ្នាំ២០២៦ -- ក្រសួងនវានុវត្តន៍ និងការផ្លាស់ប្តូរឌីជីថលរបស់ប្រទេសប៊ុលហ្ការី រួមជាមួយទីភ្នាក់ងារអវកាសអឺរ៉ុប (ESA) នឹងរៀបចំកម្មវិធីទិវាផ្តល់ព័ត៌មាននៅថ្ងៃទី០៦ និងថ្ងៃទី០៧ ខែតុលា ឆ្នាំ២០២៦ដោយផ្តោតទៅលើឱកាសគាំទ្រថ្មីៗសម្រាប់វិស័យអវកាសរបស់ប្រទេសប៊ុលហ្គារី។ ក្រសួងបានប្រកាសនៅលើគេហទំព័រផ្លូវការរបស់ខ្លួនកាលពីថ្ងៃចន្ទថា ព្រឹត្តិការណ៍នេះនឹងប្រព្រឹត្តទៅនៅឧទ្យានបច្ចេកវិទ្យាសូហ្វីយ៉ា(Sofia Tech Park) ក្នុងរដ្ឋធានីនៃប្រទេសប៊ុលហ្គារី។

តំណាងមកពីបណ្តាក្រុមហ៊ុន សហគ្រាសចាប់ផ្តើមអាជីវកម្ម ស្ថាប័នស្រាវជ្រាវ និងសាកលវិទ្យាល័យនានា នឹងមានឱកាសស្វែងយល់អំពីលក្ខខណ្ឌនៃការដាក់ពាក្យស្នើសុំក្រោមការប្រកាសលើកទី១២ នៃផែនការសម្រាប់រដ្ឋដែលសហការជាមួយអឺរ៉ុប (PECS)។

អ្នកជំនាញរបស់ទីភ្នាក់ងារ ESA នឹងផ្តល់ការណែនាំជាក់ស្តែងអំពីការរៀបចំសំណើគម្រោង ការបង្កើតផែនការអាជីវកម្ម និងការធ្វើការងារជាមួយឯកសារកំណត់វិសាលភាពការងារ។ អ្នកចូលរួមនឹងមានឱកាសជួបពិភាក្សាផ្ទាល់ជាមួយអ្នកជំនាញរបស់ទីភ្នាក់ងារនេះ ដើម្បីពិភាក្សាអំពីគំនិត និងគម្រោងដែលមានសក្តានុពលរបស់ពួកគេ។

ព្រឹត្តិការណ៍នេះ គឺជាផ្នែកមួយនៃកាតព្វកិច្ចរបស់ប្រទេសប៊ុលហ្គារីក្រោមក្របខ័ណ្ឌ PECS ហើយមានគោលបំណងលើកទឹកចិត្តឱ្យមានការចូលរួមពីស្ថាប័ននានារបស់ប៊ុលហ្គារីនៅក្នុងកម្មវិធីរបស់ ESA ជំរុញការអភិវឌ្ឍដំណោះស្រាយបច្ចេកវិទ្យាខ្ពស់ និងពង្រឹងជំហររបស់ប្រទេសនេះនៅក្នុងវិស័យអវកាសអឺរ៉ុប៕

ដោយ៖ យា ចិន្ដាខន្ដី (ប្រភព៖ BTA)