ENGLISH
FRENCH
中文
ARABAKP ភ្នំពេញ ថ្ងៃទី០១ ខែតុលា ឆ្នាំ២០២៦ -- ទីភ្នាក់ងារលទ្ធកម្មអាវុធរបស់ទីក្រុងសេអ៊ូលបានឱ្យដឹងកាលពីថ្ងៃអង្គារថា ប្រទេសកូរ៉េខាងត្បូងបានពិភាក្សាជាមួយប្រទេសឥណ្ឌាអំពីគម្រោងនាំចេញប្រព័ន្ធការពារដែនអាកាសមួយដែលធ្លាប់បានជាប់គាំង ខណៈដែលមានសញ្ញាវិជ្ជមានថ្មីៗជុំវិញលទ្ធភាពដែលទីក្រុងញូវដេលីអាចនឹងទិញប្រព័ន្ធអាវុធប្រឆាំងយន្តហោះនេះ។
នៅក្នុងសេចក្តីថ្លែងការណ៍មួយ ទីភ្នាក់ងារគ្រប់គ្រងការពារជាតិ(DAPA) បានឱ្យដឹងថា ប្រព័ន្ធការពារដែនអាកាស Biho Hybrid គឺជាប្រធានបទមួយក្នុងចំណោមប្រធានបទដែលត្រូវបានពិភាក្សាដោយមន្ត្រីរបស់ទីភ្នាក់ងារ DAPA និងក្រសួងការពារជាតិឥណ្ឌា ក្នុងអំឡុងកិច្ចប្រជុំគណៈកម្មការចម្រុះស្តីពីវិស័យការពារជាតិ និងភស្តុភារកម្ម នៅទីក្រុងញូវដេលី កាលពីថ្ងៃអង្គារ។
ពីមុន ប្រទេសឥណ្ឌាធ្លាប់បានពិចារណាទិញប្រព័ន្ធយានយន្តពាសដែកBiho Hybrid នៅក្នុងកិច្ចព្រមព្រៀងដែលមានតម្លៃប៉ាន់ស្មាន ២,៥ប៊ីលានដុល្លារអាម៉េរិក ប៉ុន្តែគម្រោងនេះមិនមានវឌ្ឍនភាពទៅមុខទេ ដោយសាររដ្ឋាភិបាលឥណ្ឌាបានជំរុញការផលិតអាវុធការពារជាតិនៅក្នុងស្រុក។
ប្រព័ន្ធការពារដែនអាកាស Biho Hybrid ដែលផលិតដោយក្រុមហ៊ុនHanwha Aerospace Co. បំពាក់ដោយកាំភ្លើងធំភ្លោះទំហំ ៣០មីលីម៉ែត្រដែលអាចបាញ់បានលឿនសម្រាប់គោលដៅរយៈចម្ងាយជិត និងមានមីស៊ីលសម្រាប់ទប់ទល់នឹងការគំរាមកំហែងនៅរយៈចម្ងាយឆ្ងាយ។ វាត្រូវបានចាត់ទុកថាជាប្រព័ន្ធដ៏មានប្រសិទ្ធភាពក្នុងការទប់ទល់នឹងយន្តហោះគ្មានមនុស្សបើក (drones) និងយន្តហោះចម្បាំងដែលហោះហើរក្នុងកម្ពស់ទាប។
របាយការណ៍របស់ប្រព័ន្ធផ្សព្វផ្សាយបានឱ្យដឹងថា ប្រទេសឥណ្ឌាកំពុងពិចារណាឡើងវិញលើប្រព័ន្ធ Biho Hybrid ស្របពេលដែលមានតម្រូវការកើនឡើងក្នុងការទទួលបានប្រព័ន្ធប្រឆាំងយន្តហោះគ្មានមនុស្សបើក ក្រោមការខិតខំប្រឹងប្រែងធ្វើទំនើបកម្មយោធារបស់ខ្លួន។
ទីភ្នាក់ងារ DAPA បានបញ្ជាក់ថា៖ «ភាគីទាំងពីរបានវាយតម្លៃលើស្ថានភាពបច្ចុប្បន្ននៃកិច្ចសហប្រតិបត្តិការឧស្សាហកម្មការពារជាតិរបស់ពួកគេ និងបានផ្លាស់ប្តូរទស្សនៈលើភាពជាដៃគូដែលអាចកើតមាននាពេលអនាគតក្នុងវិស័យផ្សេងៗ»។
ទីភ្នាក់ងារនេះបានបន្ថែមថា៖ «ជាពិសេស ភាគីកូរ៉េខាងត្បូងបានពិភាក្សាអំពីវិធីសាស្រ្តនានាដើម្បីធានាឱ្យមានវឌ្ឍនភាពប្រកបដោយស្ថិរភាព និងការគាំទ្រផ្នែកប្រតិបត្តិការសម្រាប់គម្រោងរួមធំៗ រួមទាំងប្រព័ន្ធBiho Hybrid ដែលកំពុងស្ថិតក្រោមការពិភាក្សាជាមួយប្រទេសឥណ្ឌានិងរថក្រោះ K9 ដែលកំពុងប្រើប្រាស់ដោយកងទ័ពជើងគោកឥណ្ឌា»៕
ដោយ៖ មូល មិនា (ប្រភព៖ យ៉ុនហាប់)
