ចក្ខុវិស័យសហគមន៍អាស៊ានឆ្នាំ២០៤៥៖ ពីការប្តេជ្ញាចិត្តថ្នាក់តំបន់ទៅជាឱកាសអភិវឌ្ឍន៍សម្រាប់មូលដ្ឋាន

AKP ភ្នំពេញ ថ្ងៃទី១៣ ខែតុលា ឆ្នាំ២០២៦ -- ក្រសួងការបរទេសវៀតណាម បានរៀបចំសិក្ខាសាលាមួយក្នុងទម្រង់ចម្រុះ (ទាំងផ្ទាល់ និងតាមអនឡាញ) ក្រោមប្រធានបទ «ចក្ខុវិស័យសហគមន៍អាស៊ានឆ្នាំ២០៤៥៖ ពីការប្តេជ្ញាចិត្តក្នុងតំបន់ទៅជាឱកាសអភិវឌ្ឍន៍សម្រាប់មូលដ្ឋាន» នៅទីក្រុងហាណូយ កាលពីពេលថ្មីៗនេះ។

ព្រឹត្តិការណ៍នេះមានគោលបំណងអនុវត្តសេចក្តីសន្និដ្ឋានលេខ៥៩-KL/TW របស់ការិយាល័យនយោបាយ ស្តីពីទិសដៅសម្រាប់ការចូលរួមរបស់វៀតណាមនៅក្នុងអាស៊ានរហូតដល់ឆ្នាំ២០៣០ ដោយនាំយករបៀបវារៈនៃកិច្ចសហប្រតិបត្តិការរបស់ប្លុកនេះឱ្យកាន់តែជិតស្និទ្ធជាមួយអាជ្ញាធរមូលដ្ឋាន ធុរកិច្ច និងប្រជាពលរដ្ឋ។

អនុរដ្ឋមន្ត្រីការបរទេសវៀតណាម លោក ដាង ហ័ងជាំង ដែលជាប្រធានគណៈប្រតិភូកិច្ចប្រជុំមន្ត្រីជាន់ខ្ពស់អាស៊ាន (SOM) របស់វៀតណាមបានថ្លែងនៅក្នុងសុន្ទរកថាបើកថា ឆ្នាំ២០២៦ គឺជាឆ្នាំដ៏សំខាន់សម្រាប់ជំពូកបន្ទាប់របស់ប្លុកនេះ។ បណ្តាប្រទេសជាសមាជិកកំពុងចាប់ផ្តើមអនុវត្តចក្ខុវិស័យសហគមន៍អាស៊ានឆ្នាំ២០៤៥ និងផែនការយុទ្ធសាស្ត្រចំនួនបួនដែលគ្របដណ្តប់លើវិស័យនយោបាយ-សន្តិសុខ សេដ្ឋកិច្ច សង្គម-វប្បធម៌និងការតភ្ជាប់ ដើម្បីឆ្ពោះទៅរកសហគមន៍មួយដែលមានភាពធន់ នវានុវត្តន៍មានភាពស្វាហាប់ និងយកប្រជាជនជាស្នូល។

លោក ជាំង បានសង្កត់ធ្ងន់ថា មហាសន្និបាតបក្សជាតិលើកទី១៤ បានកំណត់ជាថ្មីនូវអាស៊ានថា ជាអាទិភាពយុទ្ធសាស្ត្រកំពូល ដែលផ្សារភ្ជាប់ជាមួយនឹងសន្តិសុខ និងលំហអភិវឌ្ឍន៍របស់វៀតណាម។ តម្រូវការបច្ចុប្បន្នគឺការផ្សារភ្ជាប់យ៉ាងជិតស្និទ្ធរវាងសមាហរណកម្ម និងគោលដៅអភិវឌ្ឍន៍សេដ្ឋកិច្ច-សង្គម ព្រមទាំងការពង្រីកការចូលរួម និងអត្ថប្រយោជន៍សម្រាប់ក្រសួង ស្ថាប័ន មូលដ្ឋាន ធុរកិច្ច និងប្រជាពលរដ្ឋ។

ដោយផ្អែកលើខ្លឹមសារស្នូលនៃផែនការយុទ្ធសាស្ត្រទាំងបួន តំណាងមកពីមូលដ្ឋាននានាបានបង្ហាញពីយុទ្ធសាស្ត្រអភិវឌ្ឍន៍ដែលផ្សារភ្ជាប់ជាមួយនឹងកិច្ចសហប្រតិបត្តិការអាស៊ាន រួមមាន កិច្ចសហប្រតិបត្តិការទីក្រុងឧស្សាហកម្មវប្បធម៌ និងទេសចរណ៍បេតិកភណ្ឌ ហិរញ្ញវត្ថុ និងនវានុវត្តន៍ការពង្រីកទីផ្សារនាំចេញ-នាំចូល ព្រមទាំងការតភ្ជាប់ផ្នែកដឹកជញ្ជូន និងខ្សែសង្វាក់ផ្គត់ផ្គង់។

តំណាងនានាបានលើកឡើងថា អាស៊ានមានសក្តានុពលដ៏ធំធេង មិនត្រឹមតែក្នុងវិស័យនយោបាយ និងសន្តិសុខប៉ុណ្ណោះទេ ប៉ុន្តែជាពិសេស គឺក្នុងវិស័យសេដ្ឋកិច្ច ពាណិជ្ជកម្ម និងការវិនិយោគ ដោយបញ្ជាក់ថា ប្លុកនេះក៏ដើរតួនាទីជាស្ពានតភ្ជាប់សម្រាប់តំបន់ និងក្រុមហ៊ុននានារបស់វៀតណាមដើម្បីពង្រីកកិច្ចសហប្រតិបត្តិការជាមួយដៃគូអាស៊ាន ដូចជា ចិន ជប៉ុន កូរ៉េខាងត្បូង ឥណ្ឌា អូស្ត្រាលី នូវែលសេឡង់ និងសហរដ្ឋអាមេរិកជាដើម៕

ដោយ៖ យា ចិន្ដាខន្ដី (ប្រភព៖ VNA)