លោក ហ្សេលេនស្គី៖ អ៊ុយក្រែនមិនបានទទួលការជូនដំណឹងជាមុនពីដៃគូរបស់ខ្លួន អំពីការវាយប្រហារដែលបានកើតឡើងនៅទីក្រុងគីយីវនោះទេ

AKP ភ្នំពេញ ថ្ងៃទី១៤ ខែតុលា ឆ្នាំ២០២៦ -- ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានរាយការណ៍ថា រុស្ស៊ីបានបើកការវាយប្រហារពេញមួយយប់ដោយប្រើអាវុធ រួមទាំងមីស៊ីលផ្លោង ដោយកំណត់គោលដៅលើហេដ្ឋារចនាសម្ព័ន្ធស៊ីវិល និងថាមពលរបស់ទីក្រុងគៀវ។ លោក ហ្សេលេនស្គី បានសម្តែងការព្រួយបារម្ភថា អ៊ុយក្រែនមិនបានទទួលការព្រមានជាមុនពីចារកម្មដៃគូទាក់ទងនឹងការបាញ់មីស៊ីលផ្លោង ដែលមានសារៈសំខាន់សម្រាប់ការជួយសង្គ្រោះជីវិតក្នុងអំឡុងពេលវាយប្រហារបែបនេះទេ។

ការវាយប្រហារទាំងនេះ បានកើតឡើងបើទោះបីជាមានការប្រកាសថ្មីៗអំពីបទឈប់បាញ់ ដែលស្នើឡើងដោយប្រធានាធិបតីសហរដ្ឋអាមេរិក លោក ដូណាល់ ត្រាំ ក៏ដោយ។ ខណៈដែលលោក ហ្សេលេនស្គី បានបញ្ជាក់ថា អ៊ុយក្រែនបានចៀសវាងមិនកំណត់គោលដៅលើរោងចក្រចម្រាញ់ប្រេង និងរោងចក្រថាមពលរបស់រុស្ស៊ីនោះ រយៈពេលពីរថ្ងៃបន្ទាប់ពីការប្រកាសនេះ លោកបាននិយាយថា រុស្ស៊ីបានបរាជ័យក្នុងការគោរពកិច្ចព្រមព្រៀងនេះ ដោយបង្ហាញពីចេតនាច្បាស់លាស់ក្នុងការបន្តការវាយប្រហាររបស់ខ្លួនលើហេដ្ឋារចនាសម្ព័ន្ធសំខាន់ៗ។

ទោះបីជាមានការកើនឡើងនៃភាពតានតឹងទាំងនេះក៏ដោយ ក៏លោក ហ្សេលេនស្គី បានបញ្ជាក់សារជាថ្មីអំពីការត្រៀមខ្លួនរបស់អ៊ុយក្រែនសម្រាប់ការបន្ថយភាពតានតឹងទៅវិញទៅមក ដោយសង្កត់ធ្ងន់ថា សម្ពាធសកលលោក និងការគាំទ្រពីដៃគូដ៏រឹងមាំ គឺមានសារៈសំខាន់ណាស់ដើម្បីបង្ខំឱ្យរុស្ស៊ីឆ្ពោះទៅរកសន្តិភាព។ រដ្ឋមន្ត្រីការបរទេសអ៊ុយក្រែន លោក អេនឌ្រីល ស៊ីប៊ីហា បានបញ្ជាក់ថា ការចែករំលែកចារកម្មជាមួយសហរដ្ឋអាមេរិកនៅតែបន្ត ដោយសន្មតថា ការព្រមានអំពីការវាយប្រហារតាមអាកាស គឺដោយសារតែប្រភេទជាក់លាក់នៃអាវុធរបស់រុស្ស៊ីដែលប្រើប្រាស់ជាជាងការរំខានក្នុងកិច្ចសហប្រតិបត្តិការ៕

ដោយ៖ យា ចិន្ដាខន្ដី (ប្រភព៖ AA-AKP)