សិង្ហបុរីរក្សាបានកំណើនសេដ្ឋកិច្ចដ៏រឹងមាំ

AKP ភ្នំពេញ ថ្ងៃទី២៣ ខែតុលា ឆ្នាំ២០២៦ -- សេដ្ឋកិច្ចរបស់ប្រទេសសិង្ហបុរីបានរក្សាការរីកចម្រើនយ៉ាងខ្លាំងក្នុងរយៈពេល ៩ខែដំបូងនៃឆ្នាំ២០២៦ បើទោះបីជាល្បឿននៃកំណើននេះបានថយចុះបន្តិចម្តងៗពីមួយត្រីមាសទៅមួយត្រីមាសក៏ដោយ។

យោងតាមទីភ្នាក់ងារសហគ្រាសសិង្ហបុរី (EnterpriseSG) បានឱ្យដឹងថា ទំហំពាណិជ្ជកម្មទំនិញសរុបរបស់ប្រទេសនេះបានកើនឡើងដល់ជិត១៧៨,៨ពាន់លានដុល្លារសិង្ហបុរី (ស្មើនឹង ១៤០ពាន់លានដុល្លារអាម៉េរិក) នៅក្នុងខែកញ្ញា ដែលកើនឡើង ៥០,៨% បើធៀបនឹងរយៈពេលដូចគ្នាកាលពីឆ្នាំមុន។ ការនាំចេញបានកើនឡើង ៥១,៥% ដល់តម្លៃ ៩៤,៤ពាន់លានដុល្លារសិង្ហបុរី ខណៈដែលការនាំចូលបានកើនឡើង ៤៩,៩% ដល់តម្លៃ៨៤,៣ពាន់លានដុល្លារសិង្ហបុរី។ ការនាំចេញទំនិញផលិតក្នុងស្រុកមានចំនួន៣៤,៣ពាន់លានដុល្លារសិង្ហបុរី (កើនឡើង ៤៦,៧%) ចំណែកឯការនាំចេញបន្ត បានកើនឡើងយ៉ាងខ្លាំងចំនួន ៥៤,៤% ដល់តម្លៃ ៦០,១ពាន់លានដុល្លារសិង្ហបុរី។

ក្នុងរយៈពេល ៩ខែដំបូងនៃឆ្នាំ២០២៦ ទំហំពាណិជ្ជកម្មនាំចេញ-នាំចូលសរុបរបស់ប្រទេសសិង្ហបុរីមានចំនួនជិត ១,៣៩ទ្រីលានដុល្លារសិង្ហបុរី ដែលកើនឡើង ៣៦,៩% បើធៀបនឹងរយៈពេលដូចគ្នាកាលពីឆ្នាំមុន។ ការនាំចេញបានកើនឡើង ៣៨% ដល់តម្លៃ ៧៤៣,៤ពាន់លានដុល្លារសិង្ហបុរី ខណៈដែលការនាំចូលបានកើនឡើង ៣៥,៧% ដល់តម្លៃ ៦៤៦,៥ពាន់លានដុល្លារសិង្ហបុរី។ ការនាំចេញទំនិញផលិតក្នុងស្រុកមានចំនួន ២៥១ពាន់លានដុល្លារសិង្ហបុរី (កើនឡើង ១៩,៨%) ចំណែកឯការនាំចេញបន្តបានកើនឡើង៤៩,៥% ដល់តម្លៃ ៤៩២,៣ពាន់លានដុល្លារសិង្ហបុរី។

ការិយាល័យពាណិជ្ជកម្មវៀតណាមប្រចាំនៅសិង្ហបុរីបានលើកឡើងថាកំណើននេះភាគច្រើន គឺដោយសារតែតួនាទីរបស់សិង្ហបុរីក្នុងនាមជាមជ្ឈមណ្ឌលដឹកជញ្ជូនបន្ត និងជាមជ្ឈមណ្ឌលចែកចាយក្នុងតំបន់សម្រាប់គ្រឿងបន្លាស់ និងឧបករណ៍អេឡិចត្រូនិកនៅក្នុងខ្សែច្រវាក់ផ្គត់ផ្គង់ក្នុងតំបន់។

ពាណិជ្ជកម្មរបស់សិង្ហបុរីជាមួយដៃគូពាណិជ្ជកម្មសំខាន់ៗភាគច្រើនក្នុងចំណោមដៃគូទាំង ១៥ ក៏បានកត់ត្រានូវកំណើនវិជ្ជមានផងដែរក្នុងអំឡុងពេលនេះ។ តៃវ៉ាន់ (ចិន) នៅតែជាដៃគូពាណិជ្ជកម្មធំបំផុត ដោយទំហំពាណិជ្ជកម្មទ្វេភាគីមានចំនួន ២១៩,២ពាន់លានដុល្លារសិង្ហបុរីដែលកើនឡើង ៨៣,២% បើធៀបនឹងរយៈពេលដូចគ្នាកាលពីឆ្នាំមុន។

ដៃគូធំៗចំនួន៤ ផ្សេងទៀតរួមមាន ប្រទេសចិន ដែលមានទំហំពាណិជ្ជកម្មទ្វេភាគី ១៤៤,៣ពាន់លានដុល្លារសិង្ហបុរី (កើនឡើង ២១%)ប្រទេសម៉ាឡេស៊ី ១៤០,១ពាន់លានដុល្លារសិង្ហបុរី (កើនឡើង ៣០,២%) សហរដ្ឋអាមេរិក ១២៩ពាន់លានដុល្លារសិង្ហបុរី (កើនឡើង ២៧,១%) និងហុងកុង (ចិន) ដែលមានទំហំប្រហែល ៩០,៦ពាន់លានដុល្លារសិង្ហបុរី(កើនឡើង ៤៤,៩%)។

ទីផ្សារមួយចំនួនបានកត់ត្រានូវកំណើនដ៏ខ្លាំងក្លា ជាពិសេស គឺប្រទេសម៉ិកស៊ិក ដែលពាណិជ្ជកម្មបានកើនឡើង ១៧៥,៦% (ដោយការនាំចេញរបស់សិង្ហបុរីបានកើនឡើងដល់ ២២១,៣%)។ ក្នុងចំណោមដៃគូពាណិជ្ជកម្មសំខាន់ៗទាំង១៥ មានតែប្រទេសឥណ្ឌូណេស៊ីមួយគត់ ដែលបានកត់ត្រានូវការថយចុះបន្តិចបន្តួច ដោយពាណិជ្ជកម្មទ្វេភាគីបានធ្លាក់ចុះ ២,៣%។

យោងតាមការប៉ាន់ប្រមាណបឋមដែលចេញផ្សាយដោយក្រសួងពាណិជ្ជកម្ម និងឧស្សាហកម្មសិង្ហបុរី (MTI) កាលពីថ្ងៃទី១៤ ខែតុលាផលិតផលក្នុងស្រុកសរុប (GDP) របស់សិង្ហបុរីបានកើនឡើង ៥,៤% ធៀបនឹងរយៈពេលដូចគ្នាកាលពីឆ្នាំមុន នៅក្នុងត្រីមាសទី៣ បន្ទាប់ពីមានកំណើន៦,៣% ក្នុងត្រីមាសទី១ និង ៦,២% ក្នុងត្រីមាសទី២ (ដែលតួលេខនេះត្រូវបានកែសម្រួលឡើងពី ៥,៩% ដែលត្រូវបានប្រកាសកាលពីខែសីហា)។

លទ្ធផលនេះធ្វើឱ្យកំណើនសេដ្ឋកិច្ចជាមធ្យមក្នុងរយៈពេល ៩ខែដំបូងនៃឆ្នាំ២០២៦ ស្ថិតនៅកម្រិតប្រហែល ៦% ដែលខ្ពស់ជាងការព្យាករណ៍របស់ក្រសួងមុនខែសីហា (ដែលបានប៉ាន់ប្រមាណថាមានកំណើនពី ២% ទៅ ៤%) យ៉ាងខ្លាំង។

បើធៀបនឹងត្រីមាសមុន GDP ដែលបានកែសម្រួលតាមរដូវកាល បានកើនឡើង ១,១% នៅក្នុងត្រីមាសទី៣ ដែលជាអត្រាមួយយឺតជាងកំណើន១,៥% នៅក្នុងត្រីមាសទី២។

ផ្អែកលើលទ្ធផលទាំងនេះ សិង្ហបុរីទំនងជានឹងសម្រេចបាន ឬអាចលើសពីការព្យាករណ៍កំណើនប្រចាំឆ្នាំដែលក្រសួងបានកែសម្រួលថ្មីកាលពីខែសីហា គឺស្ថិតនៅក្នុងចន្លោះពី ៤,៥% ទៅ ៥,៥%៕

ដោយ៖ យា ចិន្ដាខន្ដី (ប្រភព៖ VNA)