អគ្គលេខាធិការអង្គការសហប្រជាជាតិស្វាគមន៍ចំពោះកិច្ចព្រមព្រៀង ស្តីពីបទឈប់បាញ់នៅអាលីយ៉ូស្គី

AKP ភ្នំពេញ ថ្ងៃទី២៦ ខែតុលា ឆ្នាំ២០២៦ -- លោក ស្ទេហ្វេន ឌូចារីកអ្នកនាំពាក្យរបស់អគ្គលេខាធិការអង្គការសហប្រជាជាតិ លោក អេនតូនីញ៉ូ ហ្គតេរេស បានឱ្យដឹងថា លោកអគ្គលេខាធិការស្វាគមន៍ចំពោះកិច្ចព្រមព្រៀង ស្តីពីការចាប់ផ្តើមបទឈប់បាញ់ក្នុងពេលឆាប់ៗនេះ នៅទីក្រុងអាលីយ៉ូស្គី ក្នុងតំបន់ឃើរសិន។

នៅក្នុងសេចក្តីថ្លែងការណ៍មួយ លោកបានមានប្រសាសន៍ថា «លោកអគ្គលេខាធិការស្វាគមន៍ចំពោះការប្រកាសរបស់លោកស្រី ម៉េឡានៀ ត្រាំស្ត្រីទីមួយនៃសហរដ្ឋអាមេរិក អំពីបទឈប់បាញ់ ដែលសម្រេចបានតាមរយៈកិច្ចចរចា ហើយនឹងចាប់ផ្តើមក្នុងពេលឆាប់ៗនេះនៅទីក្រុងអាលីយ៉ូស្គី។ លោកក៏បានកោតសរសើរចំពោះកិច្ចខិតខំប្រឹងប្រែងរបស់ភាគីទាំងអស់ ដែលបានចូលរួមចំណែកដើម្បីសម្រេចបាននូវលទ្ធផលនេះផងដែរ»។

លោកបានបន្ថែមថា «លោកសង្ឃឹមថា វិធានការនេះ និងជំហានផ្សេងទៀត នឹងជួយសម្រាលស្ថានភាពមនុស្សធម៌ដ៏ធ្ងន់ធ្ងរនៅក្នុងទីក្រុងអូឡេស្គី ព្រមទាំងអនុញ្ញាតឱ្យមានការផ្តល់ជំនួយសង្គ្រោះជីវិតជាបន្ទាន់។ លើសពីនេះ វាក៏នឹងជួយសម្រួលដល់ការជម្លៀសប្រជាពលរដ្ឋចេញពីទីក្រុងនោះដោយសុវត្ថិភាព និងដោយស្ម័គ្រចិត្ត ស្របតាមច្បាប់មនុស្សធម៌អន្តរជាតិយ៉ាងតឹងរ៉ឹងផងដែរ។ លោកសង្ឃឹមថា ការរៀបចំទាំងនេះអាចពង្រីកទៅកាន់តំបន់ផ្សេងទៀត ដែលប្រជាពលរដ្ឋកំពុងរងទុក្ខលំបាក»។

នៅពេលមុននេះ លោក វ៉ាឡេរី ហ្គេរ៉ាស៊ីម៉ូវ អគ្គសេនាធិការនៃកងកម្លាំងប្រដាប់អាវុធរុស្ស៊ី ដែលជាអនុរដ្ឋមន្ត្រីការពារជាតិទីមួយ និងជាឧត្តមសេនីយ៍កងទ័ពផងនោះ បានថ្លែងថា កងទ័ពរុស្ស៊ីនឹងអនុវត្តបទបទឈប់បាញ់មួយនៅក្នុងតំបន់ឃើសិន ចាប់ពីម៉ោង ៤:០០នាទីព្រឹក (ម៉ោងនៅទីក្រុងមូស្គូ) ឬម៉ោង ១:០០នាទីព្រឹក (ម៉ោងសកល GMT) ថ្ងៃទី២៧ ខែតុលា ដើម្បីអនុវត្តប្រតិបត្តិការមនុស្សធម៌។

សេតវិមានបានប្រកាសកាលពីថ្ងៃទី២៣ ខែតុលា ថា ប្រទេសរុស្ស៊ី និងអ៊ុយក្រែន បានព្រមព្រៀងគ្នាលើបទឈប់បាញ់មួយនៅក្នុងតំបន់អាលីយ៉ូស្គី ចាប់ពីថ្ងៃទី២៩ ខែតុលា តទៅ ដើម្បីធានាដល់ការដឹកជញ្ជូនជំនួយមនុស្សធម៌ និងរៀបចំសម្រាប់ការជម្លៀសជនស៊ីវិលតាមរយៈច្រករបៀងសុវត្ថិភាពពិសេសមួយ។ អង្គការប្រព័ន្ធផ្សព្វផ្សាយឯករាជ្យមួយមកពីសហរដ្ឋអាមេរិក នឹងធ្វើការតាមដាន និងកត់ត្រាទុកនូវសកម្មភាពរបស់ភាគីរុស្ស៊ី និងអ៊ុយក្រែននៅនឹងកន្លែងផ្ទាល់ ក្នុងអំឡុងពេលដំណើរការទាំងមូលនៃបទឈប់បាញ់នេះ៕

ដោយ៖ យា ចិន្ដាខន្ដី (ប្រភព៖ តាសស៍)