ប្រទេសចិនបង្ហាញគំនិតផ្តួចផ្តើម ស្តីពីអភិបាលកិច្ចជីវៈចម្រុះ និងមូលនិធិសម្រាប់ការចែករំលែកផលប្រយោជន៍ នៅឯកិច្ចប្រជុំ COP17

AKP ភ្នំពេញ ថ្ងៃទី២៦ ខែតុលា ឆ្នាំ២០២៦ -- នៅឯសាលតាំងបង្ហាញរបស់ប្រទេសចិនក្នុងសន្និសីទភាគីហត្ថលេខីនៃអនុសញ្ញាអង្គការសហប្រជាជាតិ ស្តីពីជីវៈចម្រុះ លើកទី១៧ (COP17) គំនិតផ្តួចផ្តើមស្តីពីអភិបាលកិច្ចជីវៈចម្រុះដែលមានភាគីពាក់ព័ន្ធចម្រុះ រួមជាមួយមូលនិធិពិសេសសម្រាប់ការបែងចែកផលប្រយោជន៍ ត្រូវបានដាក់ឱ្យដំណើរការជាផ្លូវការ។ គំនិតផ្តួចផ្តើមផ្នែកអភិបាលកិច្ចនេះ ត្រូវបានបង្កើតឡើងដោយស្ថាប័នធំៗចំនួនបួនរួមទាំងបណ្ឌិត្យសភាស្រាវជ្រាវវិទ្យាសាស្ត្របរិស្ថានចិន និងសាកលវិទ្យាល័យប៉េកាំង ដើម្បីកសាងវេទិកាសហការមួយដែលតភ្ជាប់ស្ថាប័នរដ្ឋក្រុមស្រាវជ្រាវ ធុរកិច្ច និងសហគមន៍មូលដ្ឋាន។

គំនិតផ្តួចផ្តើមនេះឆ្លើយតបដោយផ្ទាល់ទៅនឹង «ក្របខ័ណ្ឌជីវៈចម្រុះសកលគុនមីង-ម៉ុងត្រេអាល់» ដែលត្រូវបានអនុម័តនៅក្នុងសន្និសីទCOP15។ ក្របខ័ណ្ឌនេះជំរុញឱ្យមានការចូលរួមយ៉ាងទូលំទូលាយពីគ្រប់ផ្នែកនៃសង្គមក្នុងការអភិរក្សជីវៈចម្រុះ។ វេទិកានេះនឹងផ្តោតលើការការពារប្រព័ន្ធអេកូឡូស៊ី ការអភិវឌ្ឍសហគមន៍ប្រកបដោយចីរភាព ឧស្សាហកម្មដែលមិនប៉ះពាល់ដល់ជីវៈចម្រុះ និងតំបន់អភិរក្សដែលខ្វះខាតថវិកា។ ទន្ទឹមនឹងនេះ វាក៏នឹងជួយការពារវប្បធម៌អេកូឡូស៊ីក្នុងតំបន់ និងធានាឱ្យមានការបែងចែកផលប្រយោជន៍ដោយយុត្តិធម៌ ដែលទទួលបានពីធនធានពន្ធុផងដែរ។

ដើម្បីធានាបាននូវផលប្រសិទ្ធភាពប្រកបដោយចីរភាព គំនិតផ្តួចផ្តើមនេះនឹងបង្កើតគណៈកម្មាធិការអ្នកជំនាញមួយ ដើម្បីគ្រប់គ្រងផែនការសកម្មភាពប្រចាំឆ្នាំ ការវាយតម្លៃ និងការផ្សព្វផ្សាយដល់សាធារណជន។ស្របពេលជាមួយគ្នានេះ មូលនិធិថ្មីសម្រាប់ការបែងចែកផលប្រយោជន៍ជីវៈចម្រុះ ដែលបង្កើតឡើងដោយមូលនិធិ Ant Forest និងមូលនិធិ Shan Shui នឹងប្រមូលធនធានដើម្បីគាំទ្រដល់គម្រោងគំរូនៅមូលដ្ឋាន។ គម្រោងទាំងនេះនឹងប្រែក្លាយកិច្ចខិតខំប្រឹងប្រែងអភិរក្សទៅជាផលប្រយោជន៍ជាក់ស្តែងសម្រាប់សហគមន៍មូលដ្ឋាន៕

ដោយ៖ យា ចិន្ដាខន្ដី (ប្រភព៖ ឆាយណាដេលី)