អ៊ីរ៉ង់បញ្ជាក់ពីជំនួបជាមួយបណ្តាប្រទេសនៃកិច្ចព្រមព្រៀងការពារជាតិមេកា នៅទីក្រុងតេអេរ៉ង់

AKP ភ្នំពេញ ថ្ងៃទី២៧ ខែតុលា ឆ្នាំ២០២៦ -- លោក អាលី បាកហេរី កានីអនុលេខាធិការនៃក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់បាននិយាយថា មន្ត្រីមកពីបណ្តាប្រទេសដែលបានចុះហត្ថលេខាលើ «កិច្ចព្រមព្រៀងការពាររួមទីក្រុងមេកា» (Mecca Joint Defense Agreement) ជួបពិភាក្សាគ្នានៅទីក្រុងតេអេរ៉ង់កាលពីថ្ងៃចន្ទ ស្តីពីសន្តិសុខក្នុងតំបន់។

លោក បាហេរី​ កានី បានប្រាប់បណ្តាញផ្សព្វផ្សាយរដ្ឋអ៊ីរ៉ង់ IRIB ថា«រដ្ឋមន្ត្រីការពារជាតិអារ៉ាប៊ីសាអូឌីត លោក ខាលីដ ប៊ីន សាល់ម៉ាន់មេបញ្ជាការកងទ័ពប៉ាគីស្ថាន លោក អាស៊ីម មូនៀរ និងប្រធានទីភ្នាក់ងារស៊ើបការណ៍សម្ងាត់តួកគីយ៉េ លោក អ៊ីប្រាហ៊ីម កាលីន នឹងចូលរួមក្នុងកិច្ចប្រជុំរួមមួយក្នុងអំឡុងពេលដែលពួកគេទៅបំពេញទស្សនកិច្ចនៅទីក្រុងតេអេរ៉ង់នោះ»។

លោក អេសស្មែល បាកាអី អ្នកនាំពាក្យក្រសួងការបរទេសអ៊ីរ៉ង់បានឱ្យដឹងថា មន្ត្រីទាំង ៣រូបនេះ ត្រូវបានគេរំពឹងថានឹងជួបពិភាក្សាជាមួយប្រធានាធិបតីអ៊ីរ៉ង់ លោក ម៉ាសាអ៊ូដ ប៉េហ្សេសគីអាន់ និងប្រធានក្រុមប្រឹក្សាសន្តិសុខជាតិជាន់ខ្ពស់ លោក ម៉ូសេន រ៉េហ្សាអី។ ពួកគេនឹងពិភាក្សាគ្នាអំពីស្ថានភាពនៅក្នុងប្រទេសលីបង់ និងប៉ាឡេស្ទីន សកម្មភាពរបស់អ៊ីស្រាអែលនៅក្នុងតំបន់ ព្រមទាំងលទ្ធផលនៃការវាយប្រហាររួមគ្នារវាងសហរដ្ឋអាមេរិកនិងអ៊ីស្រាអែល ទៅលើអ៊ីរ៉ង់។

លោក រ៉ាយ៉េដ គ្រីមលី អនុរដ្ឋមន្ត្រីការបរទេសអារ៉ាប៊ីសាអូឌីតទទួលបន្ទុកផ្នែកការទូតសាធារណៈ បានលើកឡើងថា ពួកគេក៏នឹងពិភាក្សាគ្នាអំពីកិច្ចខិតខំប្រឹងប្រែងដើម្បីកាត់បន្ថយភាពតានតឹងក្នុងបរិបទដែលជម្លោះរវាងអ៊ីរ៉ង់ និងសហរដ្ឋអាមេរិកកំពុងកើនឡើងខ្លាំងផងដែរ។

កិច្ចពិភាក្សានេះនឹងធ្វើឡើងនៅក្នុងកាលៈទេសៈដែលមានការវាយប្រហារពីសំណាក់ចលនាអាន់សារ អាឡោះ របស់យេម៉ែន (ដែលគេស្គាល់ផងដែរថាជាក្រុមឧទ្ទាមហ៊ូធី) ទៅលើប្រទេសអារ៉ាប៊ីសាអូឌីត ស្របពេលដែលអ៊ីរ៉ង់បានផ្តល់ជូននូវការសម្របសម្រួលដើម្បីដោះស្រាយជម្លោះនេះ។

កិច្ចព្រមព្រៀងការពាររួមទីក្រុងមេកា ត្រូវបានចុះហត្ថលេខានៅថ្ងៃទី០៧ ខែសីហា ដោយរួមមានប្រទេសអារ៉ាប៊ីសាអូឌីត តួកគីយ៉េ និងប៉ាគីស្ថាន។ កិច្ចព្រមព្រៀងនេះមានគោលបំណងពង្រឹងសមត្ថភាពទប់ស្កាត់រួមគ្នា ដោយចាត់ទុកថា ការវាយប្រហារដោយអាវុធទៅលើភាគីណាមួយក្នុងចំណោមភាគីទាំងនេះ គឺស្មើនឹងការវាយប្រហារទៅលើភាគីទាំងអស់៕

ដោយ៖ យា ចិន្ដាខន្ដី (ប្រភព៖ ស្ពុតនីក)