ការធ្វើទំនើបកម្មកសិកម្ម តាមរយៈការប្រើប្រាស់បច្ចេកវិទ្យាឌីជីថល ការកែច្នៃកសិផល នឹងជួយដល់ជីវភាពប្រជាពលរដ្ឋ និងសេដ្ឋកិច្ចជាតិ

AKP ភ្នំពេញ ថ្ងៃទី២៧ ខែតុលា ឆ្នាំ២០២៦–មន្រ្តីជាន់ខ្ពស់នៃក្រសួងព័ត៌មានបានថ្លែងថា ការធ្វើទំនើបកម្មកសិកម្ម តាមរយៈការប្រើប្រាស់បច្ចេកវិទ្យាឌីជីថល ការកែច្នៃកសិផល និងការអភិវឌ្ឍកសិកម្មបៃតង មានសារៈសំខាន់ចំពោះសន្តិសុខស្បៀង ជីវភាពប្រជាកសិករ និងកំណើនសេដ្ឋកិច្ចជាតិ ។នេះជាការថ្លែងបញ្ជាក់ពីសំណាក់ ឯកឧត្តម ប្រាក់ ថាវអមិដា អនុរដ្ឋលេខាធិការ និងជាប្រធានលេខាធិការដ្ឋានសហប្រតិបត្តិការអន្តរជាតិនៃក្រសួងព័ត៌មាន។
ថ្លែងក្នុងពិធី «កិច្ចសន្ទនាយុវជនចិន–អាស៊ានស្ដីពីការកសាងផ្ទះដ៏ប្រសើរ៖ បច្ចេកវិទ្យាជំរុញកសិកម្មទំនើប»នាថ្ងៃទី២៧ ខែតុលា ឆ្នាំ២០២៦ក្នុងរាជធានីភ្នំពេញ ឯកឧត្តម ប្រាក់ថាវអមិដា បានលើកឡើងថាការផ្សព្វផ្សាយព័ត៌មានពិសេសការជំរុញទំនើបកម្មវិស័យកសិកម្ម និងការផ្ទេរចំណេះដឹងទៅដល់ប្រជាកសិកក៏ដូចជាយុវជនជំនាន់ក្រោយដែលចាត់ ជាកម្លាំងស្នូលនោះជាកិច្ចការសំខាន់មួយចំពោះមុខ នងក៏ដូចជាជំរុញវិស័យសេដ្ឋកិច្ចឱ្យរីកចម្រើនស្របនឹងបរិបទពិភពលោក។

ឯកឧត្តមអនុរដ្ឋលេខាធិការបានលើកទឹកចិត្តដល់និស្សិត និងយុវជនឱ្យប្រើប្រាស់វេទិកានេះ ដើម្បីផ្លាស់ប្តូរទស្សនៈ សិក្សាពីបច្ចេកវិទ្យាថ្មីៗ និងបង្កើតបណ្តាញទំនាក់ទំនងរវាងគ្នា។ពីព្រោះថាកិច្ចសហការរបស់យុវជននៅថ្ងៃនេះអាចក្លាយជាគ្រឹះសម្រាប់ការអភិវឌ្ឍវិស័យកសិកម្ម និងការកសាង «សហគមន៍វាសនារួមកម្ពុជា–ចិន» និង «ផ្ទះដ៏ប្រសើរ» សម្រាប់តំបន់ ប្រកបដោយវិបុលភាព បៃតង និងចីរភាព។

ឯកឧត្តមថ្លែងបញ្ជាក់បន្ថែមថា”តួនាទីរបស់ប្រព័ន្ធផ្សព្វផ្សាយ និងវិស័យសោតទស្សន៍ ក្នុងការនាំយកចំណេះដឹងពីអ្នកជំនាញ និងស្ថាប័នសិក្សា ទៅកាន់ប្រជាកសិករ និងសហគមន៍។ ប្រព័ន្ធផ្សព្វផ្សាយអាចជួយផ្សព្វផ្សាយបច្ចេកទេសកសិកម្មឆ្លាតវៃ ព័ត៌មានទីផ្សារ និងគំរូជោគជ័យ តាមរយៈមាតិកាអប់រំដែលងាយយល់ និងផ្សាយបានទូលំទូលាយ”។
ឯកឧត្តមអនុរដ្ឋលេខាធិការក្រសួងព័ត៌មានបានគាំទ្រឱ្យទូរទស្សន៍ជាតិកម្ពុជា និងស្ថានីយវិទ្យុ និងទូរទស្សន៍ក្វាងស៊ី បន្តពង្រឹងកិច្ចសហប្រតិបត្តិការលើការផ្លាស់ប្តូរកម្មវិធី ការផលិតឯកសាររួម និងការផ្សព្វផ្សាយគំនិតច្នៃប្រឌិត ព្រមទាំងដំណោះស្រាយដែលបានលើកឡើងក្នុងកិច្ចសន្ទនា ដើម្បីជំរុញចំណាប់អារម្មណ៍របស់យុវជនចិន និងអាស៊ានចំពោះកសិកម្មទំនើប។

ឯកឧត្តមបានវាយតម្លៃខ្ពស់ចំពោះកិច្ចសហការរវាងស្ថាប័នកម្ពុជា និងក្វាងស៊ី ក្នុងការរៀបចំវេទិកានេះ ដោយចាត់ទុកថា ជាឱកាសសម្រាប់អ្នកជំនាញ អ្នកសិក្សា និងយុវជននៃភាគីទាំងពីរ ផ្លាស់ប្តូរចំណេះដឹង បច្ចេកទេស និងស្វែងរកកាលានុវត្តភាពសហប្រតិបត្តិការជាក់ស្តែងក្នុងវិស័យកសិកម្ម។ហើយក្នុងបរិបទនេះ តំបន់ស្វយ័តជនជាតិជាំងក្វាងស៊ី ត្រូវបានចាត់ទុកថាជាច្រកសំខាន់មួយនៃកិច្ចសហប្រតិបត្តិការចិន–អាស៊ាន និងមានបទពិសោធន៍លើបច្ចេកវិទ្យាកសិកម្មឆ្លាតវៃ និងការអភិវឌ្ឍជនបទ។ជាងនេះការចែករំលែកបទពិសោធន៍ និងចំណេះដឹងពីក្វាងស៊ី អាចជួយពង្រីកកិច្ចសហប្រតិបត្តិការកសិកម្មរវាងកម្ពុជា និងចិនឱ្យកាន់តែស៊ីជម្រៅ៕

ដោយ៖មករា