ENGLISH
FRENCH
中文
ARABAKP ភ្នំពេញ ថ្ងៃទី២៨ ខែតុលា ឆ្នាំ២០២៦--រដ្ឋាភិបាលសាធារណរដ្ឋសហព័ន្ធអាល្លឺម៉ង់បានបញ្ជាក់ពីការពេញចិត្ត និងកាន់តែមានឆន្ទៈខ្ពស់ដើម្បីបន្តកិច្ចសហប្រតិបត្តិការជាមួយកម្ពុជាលើការជ្រោមជ្រែងការធ្វើកំណែទម្រង់វិមជ្ឈការ និងវិសហមជ្ឈការនៅកម្ពុជា។ នេះបើតាមការថ្លែងរបស់លោកជំទាវ SILKE RÖFER ឯកអគ្គរដ្ឋទូតថ្មីសហព័ន្ធអាល្លឺម៉ង់ប្រចាំនៅព្រះរាជាណាចក្រកម្ពុជា នាជំនួបពិភាក្សាការងារជាមួយឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ នៅទីស្តីការក្រសួងមហាផ្ទៃ នារសៀលថ្ងៃទី២៧ ខែតុលា ឆ្នាំ២០២៦។
ក្នុងជំនួបនោះ លោកជំទាវ SILKE RÖFER បានជម្រាបឯកឧត្តមអភិសន្តិបណ្ឌិត ស សុខា ថា លោកជំទាវ បានស្រាវជ្រាវ និងទទួលព័ត៌មានជាច្រើនអំពីទំនាក់ទំនងរវាងកម្ពុជា និងអាល្លឺម៉ង់ ពិសេសលទ្ធផលនៃកិច្ចសហប្រតិបត្តិការគាំទ្រកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ រួមទាំងដំណើរទស្សនកិច្ចរបស់ឯកឧត្តមអភិសន្តិបណ្ឌិត ដើម្បីឈ្វេងយល់បន្ថែមលើការងារនេះនៅប្រទេសអាល្លឺម៉ង់ និងស្វីស កាលពីឆ្នាំ២០២៤ ហើយថាចាប់ពីពេលនេះទៅលោកជំទាវនៅមានគម្រោងមួយចំនួនទៀត ដែលត្រូវបន្តធ្វើការជាមួយគ្នា។
ជាការឆ្លើយតប ឯកឧត្តមអភិសន្តិបណ្ឌិត ស សុខា បានអរគុណ និងការវាយតម្លៃខ្ពស់ចំពោះការសម្រេចបានសមិទ្ធផលជាច្រើនក្នុងដំណើរការអនុវត្តគោលនយោបាយវិមជ្ឈការ ពិសេសការផ្ទេរមុខងារ ធនធាន និងថវិកាពីថ្នាក់ជាតិទៅឱ្យរដ្ឋបាលថ្នាក់ក្រោមជាតិ ដើម្បីបង្ខិតសេវាទៅជិតប្រជាពលរដ្ឋ ស្របតាមបំណងប្រាថ្នាពង្រឹងភាពជាម្ចាស់របស់អាជ្ញាធរមូលដ្ឋាន ដូចដែលភាគីអាល្លឺម៉ង់បាន និងកំពុងបន្តជួយគាំទ្រចាប់តាំងពីរាជរដ្ឋាភិបាលនីតិកាលកន្លងមករហូតដល់បច្ចុប្បន្ន។
ប្រមុខក្រសួងមហាផ្ទៃបានរំលេចពីការរៀបចំឱ្យមានរចនាសម្ព័ន្ធដាច់ដោយឡែក និងការបោះឆ្នោត ទាំងនៅថ្នាក់ឃុំ សង្កាត់ ក្រុង ស្រុក ខណ្ឌ និងរាជធានី ខេត្ត ពិសេសការពង្រីកធនធានមនុស្ស និងថវិកាភ្ជាប់ដោយការផ្ទេរមុខងារជាង ៨០០ប្រភេទសេវាទៅឱ្យរដ្ឋបាលថ្នាក់ក្រោមជាតិបម្រើប្រជាពលរដ្ឋ។ ជាមួយគ្នានេះលទ្ធផលនៃកំណែទម្រង់នេះក៏បានឆ្លុះបញ្ចាំងយ៉ាងជាក់ស្ដែងតាមរយៈការដំឡើងមូលនិធិឃុំ សង្កាត់ពីជាមធ្យមប្រមាណ ២ម៉ឺនដុល្លារអាម៉េរិក នៅឆ្នាំ២០០២ រហូតដល់ប្រមាណ ២០ម៉ឺនដុល្លារអាម៉េរិក នៅឆ្នាំ២០២៦ជាដើម។
ក្នុងជំនួបនោះ ឯកឧត្តមអភិសន្តិបណ្ឌិត ស សុខា ក៏បានចែករំលែកព័ត៌មានជាក់ស្ដែងស្ដីពីលទ្ធផលនៃកិច្ចប្រតិបត្តិការបោសសម្អាតបទល្មើសឆបោកតាមប្រព័ន្ធបច្ចេកវិទ្យា ជាអាទិ៍ ការបណ្ដេញចេញ និងការចេញដោយស្ម័គ្រចិត្តនៃជនបរទេសប្រមាណ ៥សែននាក់ ក្នុងរយៈពេល៩ខែ ឆ្នាំ២០២៦ ការបង្កើតក្របខណ្ឌច្បាប់យ៉ាងម៉ឺងម៉ាត់ និងការបង្កើត ព្រមទាំងអនុវត្តយ៉ាងល្អនូវកិច្ចសហប្រតិបត្តិការរវាងកម្លាំងអនុវត្តច្បាប់កម្ពុជាជាមួយបណ្ដាប្រទេស និងអង្គការជាដៃគូតួយ៉ាង អាម៉េរិក ចិន អូស្ត្រាលី កូរ៉េ ជប៉ុន វៀតណាម ឥណ្ឌូនេស៊ី អង់គ្លេសជាដើម ខណៈមេក្លោងជនបរទេសជាច្រើននាក់ត្រូវចាប់បញ្ជូនចេញ និងឃាត់ខ្លួននៅកម្ពុជា ក្នុងនោះមានមន្រ្តីកម្ពុជាដែលពាក់ព័ន្ធជាច្រើននាក់ក៏ត្រូវបានចាប់ខ្លួនផងដែរ។
បើតាមឯកឧត្តមអភិសន្តិបណ្ឌិត ស សុខា ប្រតិបត្តិការកន្លងមកកម្ពុជាបានបោសសម្អាតទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាប្រមាណ ៤០០កន្លែង ហើយថ្មីៗនេះបានបន្តវិធានការបោសសម្អាតទីតាំងកាស៊ីណូស្របច្បាប់ដែលលួចបង្កប់ល្បែងភ្នាល់តាមអនឡាញ ដោយឈានទៅរកឃើញ និងដកអាជ្ញាបណ្ណកាស៊ីណូចំនួន៦ទីតាំង ខណៈភារកិច្ចដែលកម្ពុជាត្រូវបន្ត និងកំពុងមានកិច្ចសហការយ៉ាងល្អជាមួយបណ្ដាដៃគូអន្តរជាតិនោះ គឺការតាមបោសសម្អាតទីតាំងលួចលាក់តូចៗ និងការចែករំលែកព័ត៌មានដើម្បីឈានទៅកាត់ផ្ដាច់ខ្សែច្រវាក់ជាសកលរបស់ពួកឧក្រិដ្ឋជន។
ចំពោះការលើកឡើងរបស់ឯកឧត្តមអភិសន្តិបណ្ឌិត ស សុខា ដូចខាងលើនេះ លោកជំទាវឯកអគ្គរដ្ឋទូតអាល្លឺម៉ង់បានចាត់ទុកថាជាការចែករំលែកនូវព័ត៌មានដ៏មានសារសំខាន់ និងបានអះអាងថាលោកជំទាវនឹងរៀបចំព័ត៌មានទាំងនេះដើម្បីរាយការណ៍ជូនរដ្ឋាភិបាល និងភាគីពាក់ព័ន្ធនៅអាល្លឺម៉ង់ រួមទាំងក្រុមអ្នកវិនិយោគ និងអ្នកធ្វើការក្នុងវិស័យទេសចរណ៍ផងដែរ៕
ដោយ៖ ចាន់ សុភឿន (ប្រភព៖ ក្រសួងមហាផ្ទៃ)
