ENGLISH
FRENCH
中文
ARABAKP សៀមរាប ថ្ងៃទី២៨ ខែតុលា ឆ្នាំ២០២៦-- មេចុងភៅ ប៉ុល គឹមសាន ប្រធានសមាគមចុងភៅកម្ពុជា និងជាមេចុងភៅស្ត្រីដែលមានបទពិសោធន៍ជាងពីរទសវត្សរ៍ក្នុងការលើកស្ទួយម្ហូបខ្មែរ បានចូលរួមវេទិកាពិភាក្សាអន្តរជាតិស្តីពីអនាគតវិស័យបដិសណ្ឋារកិច្ច នៅសាលា EHL Hospitality Business School ទីក្រុងឡូសាន ប្រទេសស្វីស កាលពីថ្ងៃទី២៦ ខែតុលា ឆ្នាំ២០២៦ ដោយនាំយកបទពិសោធន៍ និងទស្សនៈវិស័យរបស់កម្ពុជាទៅចែករំលែកលើឆាកអន្តរជាតិ។
សមិទ្ធផលដ៏សំខាន់នេះកើតឡើងបន្ទាប់ពីមេចុងភៅ ប៉ុល គឹមសាន ត្រូវបានជ្រើសរើសជាសមាជិកផ្លូវការនៃបណ្តាញ EHL Experts Circle និងជាមេចុងភៅស្ត្រីកម្ពុជាដំបូងគេ ព្រមទាំងជាជនជាតិអាស៊ីដំបូងគេដែលបានចូលរួមក្នុងបណ្តាញអ្នកជំនាញនេះ។ បណ្តាញនេះមានតួនាទីចូលរួមបង្រៀន បង្វឹក និងចែករំលែកចំណេះដឹងដល់និស្សិតក្នុងកម្មវិធីសិក្សាថ្នាក់ Associate Degree ផ្នែកសិល្បៈម្ហូបអាហារអន្តរជាតិ បទពិសោធន៍ទទួលទានអាហារលំដាប់ខ្ពស់ និងការគ្រប់គ្រងភោជនីយដ្ឋាន។
ក្នុងពិធីសម្ពោធកម្មវិធីសិក្សាថ្មីនេះ មេចុងភៅ ប៉ុល គឹមសាន ក៏ជាស្ត្រីតែម្នាក់គត់ក្នុងចំណោមវាគ្មិនទាំង១៦រូប ដែលបានចូលរួមក្នុងវេទិកាពិភាក្សាមួយក្នុងចំណោមវេទិកាទាំងបួន។ កិច្ចពិភាក្សាផ្តោតលើការផ្លាស់ប្តូរមុខមាត់វិស័យបដិសណ្ឋារកិច្ច ការកែលម្អគុណភាពសេវាកម្ម និងការជំរុញឱ្យយុវជនជំនាន់ក្រោយចាប់អារម្មណ៍ និងចូលរួមក្នុងវិស័យនេះប្រកបដោយនិរន្តរភាព។
មេចុងភៅ ប៉ុល គឹមសាន បានមានប្រសាសន៍ថា លោកស្រីមានមោទនភាពដែលបានចូលរួមចែករំលែកបទពិសោធន៍ និងទស្សនៈវិស័យក្នុងវិស័យបដិសណ្ឋារកិច្ច ជាមួយអ្នកជំនាញល្បីៗអន្តរជាតិ។ លោកស្រីបានចាត់ទុកការក្លាយជាសមាជិក EHL Experts Circle ជាជំហានថ្មីមួយសម្រាប់វិស័យចុងភៅកម្ពុជា និងជាឱកាសបង្ហាញដល់ពិភពលោកថា កម្ពុជាអាចចូលរួមចំណែកក្នុងការអភិវឌ្ឍវិស័យទេសចរណ៍ និងបដិសណ្ឋារកិច្ចអន្តរជាតិបាន។
គួរបញ្ជាក់ថា នេះជាការវិលត្រឡប់មកកាន់សាលា EHL របស់មេចុងភៅ ប៉ុល គឹមសាន បន្ទាប់ពីបានចូលរួមចម្អិន និងបង្ហាញម្ហូបខ្មែរនៅទីនោះជាលើកដំបូងកាលពីខែកញ្ញា ឆ្នាំ២០១៨។ លោកស្រីក៏ធ្លាប់ចូលរួមក្នុងកម្មវិធី «រាត្រីនៃប្រទេសកម្ពុជា» ក្នុងក្របខណ្ឌវេទិកាសេដ្ឋកិច្ចពិភពលោក នៅទីក្រុង Davos ប្រទេសស្វីស កាលពីឆ្នាំ២០២២ ដោយបង្ហាញ និងបម្រើម្ហូបខ្មែរជូនថ្នាក់ដឹកនាំកម្ពុជា និងភ្ញៀវកិត្តិយសអន្តរជាតិផងដែរ។
សមិទ្ធផលនេះបានបង្ហាញពីសក្តានុពលរបស់អ្នកជំនាញកម្ពុជា ក្នុងការចូលរួមលើកកម្ពស់កេរ្តិ៍ឈ្មោះម្ហូបខ្មែរ និងពង្រីកឱកាសសម្រាប់វិស័យទេសចរណ៍ និងបដិសណ្ឋារកិច្ចកម្ពុជាឱ្យកាន់តែមានភាពលេចធ្លោលើឆាកអន្តរជាតិ៕
ដោយ ឃុត សៅ
