ឯកឧត្តម កែ គឹមយ៉ាន ថ្វាយព្រះពរព្រះមហាក្សត្រ ក្នុងឱកាសខួបលើកទី២២ នៃការយាងគ្រងព្រះបរមសិរីរាជសម្បត្តិ

AKP បន្ទាយមានជ័យ ថ្ងៃ២៨ ខែតុលា ឆ្នាំ២០២៦ —  ឯកឧត្តម កែ គឹមយ៉ាន តំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ បានក្រាបបង្គំទូលថ្វាយសារថ្វាយព្រះពរជ័យ សិរីមង្គល វិបុលសុខ និងបវរមហាប្រសើរ ថ្វាយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសដ៏សិរីមង្គលនៃព្រះរាជពិធីបុណ្យខួបលើកទី២២ នៃការយាងគ្រងព្រះបរមសិរីរាជសម្បត្តិ ដែលប្រព្រឹត្តទៅនៅថ្ងៃទី២៩ ខែតុលា ឆ្នាំ២០២៦។

ក្នុងសារថ្វាយព្រះពរ ឯកឧត្តម កែ គឹមយ៉ាន និងភរិយា បានសម្តែងនូវកតញ្ញូតាធម៌ដ៏ជ្រាលជ្រៅ និងសេចក្តីគោរពសក្ការៈដ៏ខ្ពង់ខ្ពស់បំផុតចំពោះព្រះមហាក្សត្រ ព្រមទាំងបានបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក ទសបារមី ទេវតាថែរក្សាព្រះមហាស្វេតច្ឆត្រ និងដួងព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រីយានីគ្រប់ព្រះអង្គ សូមព្រះមេត្តាប្រោសប្រទានព្រះពរជ័យដ៏បវរមហាប្រសើរថ្វាយព្រះអង្គ។

ឯកឧត្តម និងលោកជំទាវ បានបួងសួងសូមឱ្យព្រះករុណាជាអម្ចាស់ជីវិតលើត្បូង ទ្រង់ប្រកបដោយព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លា និងព្រះជន្មាយុយឺនយូរជាងរយព្រះវស្សា ដើម្បីទ្រង់គង់ប្រថាប់ជាម្លប់ដ៏ត្រជាក់ត្រជុំដល់ប្រជារាស្ត្រខ្មែរទូទាំងព្រះរាជាណាចក្រ និងបន្តសោយសុខក្នុងសិរីរាជសម្បត្តិជានិច្ចនិរន្តរ៍។

ក្នុងសារដដែល ឯកឧត្តម កែ គឹមយ៉ាន បានបង្ហាញនូវជំនឿជាក់ និងការគោរពចំពោះព្រះរាជតួនាទីរបស់ព្រះមហាក្សត្រ ក្នុងនាមជានិមិត្តរូបនៃឯកភាពជាតិ និរន្តរភាពជាតិ ឯករាជ្យជាតិ អធិបតេយ្យជាតិ បូរណភាពទឹកដី និងកិត្យានុភាពនៃព្រះរាជាណាចក្រកម្ពុជា។

ព្រះរាជពិធីបុណ្យខួបលើកទី២២ នៃការយាងគ្រងព្រះបរមសិរីរាជសម្បត្តិ គឺជាឱកាសដ៏មានអត្ថន័យសម្រាប់ប្រជារាស្ត្រខ្មែរគ្រប់រូប ក្នុងការសម្តែងនូវកតញ្ញូតាធម៌ សេចក្តីគោរពស្រឡាញ់ និងការដឹងគុណចំពោះព្រះមហាក្សត្រ ដែលទ្រង់គង់ជាព្រះប្រមុខរដ្ឋ និងជានិមិត្តរូបនៃឯកភាពជាតិ ព្រមទាំងការបន្តថែរក្សាតម្លៃនៃព្រះរាជបល្ល័ង្ក ប្រពៃណី និងអត្តសញ្ញាណជាតិខ្មែរ។

នៅចុងបញ្ចប់នៃសារថ្វាយព្រះពរ ឯកឧត្តម កែ គឹមយ៉ាន និងលោកជំទាវ បានបង្គំទូលថ្វាយព្រះពរជ័យ សិរីមង្គល វិបុលសុខ និងបវរមហាប្រសើរគ្រប់ប្រការ ព្រមទាំងសូមព្រះអង្គទ្រង់ប្រកបដោយព្រះពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕

ដោយ៖ ឈុន សារ៉ាត