អនុប្រធានទី២ព្រឹទ្ធសភាលើកទឹកចិត្តលោក Masashi OBA និងដៃគូឱ្យបន្តប្រកបអាជីវកម្មនៅកម្ពុជា

AKP ភ្នំពេញ ថ្ងៃទី២៨ ខែតុលា ឆ្នាំ២០២៦--ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា ក្នុងជំនួបជាមួយគណៈប្រតិភូធុរកិច្ចជប៉ុន ដែលមានលោក Masashi OBA នាយកក្រុមហ៊ុន FUKUDOME CO., LTD. និងតំណាងធនាគារ The Shikoku Bank ក្រុមហ៊ុន IKEE Paving System និងក្រុមហ៊ុន Pacific Padeco International ដើម្បីពិភាក្សាអំពីឱកាសវិនិយោគ និងភាពជាដៃគូនៅកម្ពុជា នារសៀលថ្ងៃទី២៧ ខែតុលា ឆ្នាំ២០២៦ នៅវិមានព្រឹទ្ធសភា បានលើកទឹកចិត្តលោក Masashi OBA និងដៃគូបន្តប្រកបអាជីវកម្មនៅកម្ពុជាតទៅទៀត។

ក្នុងឱកាសនោះ ឯកឧត្តមបណ្ឌិតបានស្វាគមន៍យ៉ាងកក់ក្តៅ និងលើកទឹកចិត្តក្រុមហ៊ុនជប៉ុនឱ្យសិក្សាស្វែងយល់ពីសក្តានុពលវិនិយោគនៅកម្ពុជា ដោយផ្តោតលើវិស័យសំណង់ និងបច្ចេកវិទ្យាទំនើប ដើម្បីនាំយកជំនាញ និងបទពិសោធពីជប៉ុនមករួមចំណែកដល់ការអភិវឌ្ឍសេដ្ឋកិច្ចសង្គមកម្ពុជា។

ជាមួយគ្នានេះ ឯកឧត្តមបានលើកទឹកចិត្តឱ្យក្រុមហ៊ុនជប៉ុនសហការជាមួយក្រសួង ស្ថាប័នពាក់ព័ន្ធ និងក្រុមហ៊ុនក្នុងស្រុក ដើម្បីសិក្សាលទ្ធភាពអភិវឌ្ឍគម្រោងរួមគ្នា ជាពិសេសលើការធ្វើទំនើបកម្មហេដ្ឋារចនាសម្ព័ន្ធដឹកជញ្ជូន ការធ្វើដំណើរ ការកែលម្អប្រព័ន្ធលូបង្ហូរទឹក និងការគ្រប់គ្រងទឹក សំដៅលើកកម្ពស់គុណភាពរស់នៅរបស់ប្រជាពលរដ្ឋ។

ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា សង្ឃឹមថាជំនួបនាពេលនេះនឹងបើកឱកាសថ្មីៗសម្រាប់ពង្រឹងភាពជាដៃគូរវាងវិនិយោគិនជប៉ុន និងដៃគូកម្ពុជាឈានទៅសម្រេចបានលទ្ធផលជាក់ស្តែង ដែលរួមចំណែកដល់ការអភិវឌ្ឍប្រទេស និងផ្តល់ផលប្រយោជន៍ដល់ប្រជាជននៃប្រទេសទាំងពីរ កម្ពុជា-ជប៉ុន៕

ដោយ៖ ចាន់ សុភឿន (ប្រភព៖ ព្រឹទ្ធសភា)