ENGLISH
FRENCH
中文
ARABAKP ភ្នំពេញ ថ្ងៃទី២៨ ខែតុលា ឆ្នាំ ២០២៦– មន្ត្រីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជា ស្នើឱ្យក្រុមហ៊ុនតំបន់សេដ្ឋកិច្ចពិសេស គិតគូរវិនិយោគកែច្នៃកសិផលមួយចំនួន ដែលមានសក្តានុពលខ្ពស់ ដូចជា ដំទ្បូងមី ស្រូវអង្ករ និងកៅស៊ូ ដើម្បីបង្កើនតម្លៃបន្ថែមក្នុងស្រុក បង្កើតឱកាសការងារ ជំរុញការនាំចេញ និងទាញយកអត្ថប្រយោជន៍ជាអតិបរមាពីសក្តានុពលធនធានកសិកម្មរបស់កម្ពុជា។
នៅទីស្តីការក្រុមប្រឹក្សាអភិវឌ្ឍន៍កម្ពុជា នារសៀលថ្ងៃអង្គារ ១រោច ខែអស្សុជ ឆ្នាំមីមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៧ ខែតុលា ឆ្នាំ២០២៦ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភាក្សាការងារជាមួយគណៈប្រតិភូនៃក្រុមហ៊ុនតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ ដឹកនាំដោយលោក Hiroshi Uematsu នាយកប្រតិបត្តិក្រុមហ៊ុន។
បន្ទាប់ពីមតិស្វាគមន៍របស់ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា លោក Hiroshi Uematsu បានថ្លែងអំណរគុណ និងសម្តែងនូវការកោតសរសើរចំពោះក្រុមប្រឹក្សាអភិវឌ្ឍន៍កម្ពុជា ព្រមទាំងក្រសួង ស្ថាប័នពាក់ព័ន្ធ ដែលតែងតែផ្តល់កិច្ចសហការ និង ការគាំទ្រយ៉ាងល្អប្រសើរដល់សកម្មភាពធុរកិច្ចរបស់ក្រុមហ៊ុន ជាពិសេសការយកចិត្តទុកដាក់របស់ឯកឧត្តមអគ្គលេខាធិការចំពោះការអភិវឌ្ឍតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ។
លោកក៏បាន ជម្រាបជូនអំពីវឌ្ឍនភាពនៃការអភិវឌ្ឍតំបន់សេដ្ឋកិច្ចពិសេស ដែលមានកំណើននៃការនាំចេញជាបន្តបន្ទាប់ និងការត្រៀមរៀបចំពិធីអបអរសាទរខួប២០ឆ្នាំនៃការបង្កើតតំបន់សេដ្ឋកិច្ចពិសេសនេះ ដែលបានរួមចំណែកយ៉ាងសំខាន់ក្នុងការទាក់ទាញវិនិយោគ និងជំរុញសកម្មភាពសេដ្ឋកិច្ចនៅកម្ពុជា។ ជាមួយគ្នានេះ លោកក៏បានជម្រាបជូនអំពីការគិតគូរអភិវឌ្ឍតំបន់សេដ្ឋកិច្ចពិសេសថ្មីមួយទៀតនៅខេត្តកំពង់ធំផងដែរ។
ឯកឧត្តមអគ្គលេខាធិការបានវាយតម្លៃខ្ពស់ចំពោះវឌ្ឍនភាពនៃការអភិវឌ្ឍតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ និងបានលើកទឹកចិត្តឱ្យក្រុមហ៊ុនខិតខំជំរុញល្បឿននៃដំណើរការអភិវឌ្ឍតំបន់សេដ្ឋកិច្ចពិសេសថ្មី ស្ថិតនៅខេត្តកំពង់ធំ ដែលក្រុមហ៊ុនបានចុះអនុស្សារណៈយោគយល់គ្នាជាមួយរដ្ឋបាលខេត្តកំពង់ធំ ដើម្បីពង្រីកសកម្មភាពវិនិយោគ និងរួមចំណែកបន្ថែមទៀតដល់ការអភិឌ្ឍសង្គម សេដ្ឋកិច្ចកម្ពុជា ក៏ដូចជា លើកកម្ពស់បរិស្ថានវិនិយោគនៅកម្ពុជា។
បន្ថែមលើនេះ ឯកឧត្តមអគ្គលេខាធិការក៏បានស្នើឱ្យក្រុមហ៊ុនគិតគូរវិនិយោគកែច្នៃកសិផលមួយចំនួនដែលមានសក្តានុពលខ្ពស់ ដូចជា ដំទ្បូងមី ស្រូវអង្ករ និងកៅស៊ូ ដើម្បីបង្កើនតម្លៃបន្ថែមក្នុងស្រុក បង្កើតឱកាសការងារ ជំរុញការនាំចេញ និងទាញយកអត្ថប្រយោជន៍ជាអតិបរមាពីសក្តានុពលធនធានកសិកម្មរបស់កម្ពុជា។ មួយវិញទៀត ឯកឧត្តមអគ្គលេខាធិការបានទាញចំណាប់អារម្មណ៍របស់ក្រុមហ៊ុនក្នុងការវិនិយោគក្នុងឧស្សាហកម្មឈើដាំ ដើម្បីផ្គត់ផ្គង់ជាវត្ថុធាតុដើមដល់ឧស្សាហកម្មផលិតគ្រឿងសង្ហារិម ឧស្សាហកម្មផលិតក្តារបន្ទះ ដែលបច្ចុប្បន្នកំពុងមានតម្រូវ និងទៅអនាគតក៏នឹងកាន់តែមានតម្រូវការខ្ពស់៕
ដោយ៖ ចរិយា ប្រភព៖ CDC
