រដ្ឋមន្រ្ដីក្រសួងព័ត៌មាន ជំរុញឱ្យភាគីពាក់ព័ន្ធពង្រឹងការទទួលខុសត្រូវក្នុងការផ្សព្វផ្សាយពាណិជ្ជកម្មគ្រឿងស្រវឹង និងភេសជ្ជៈមានជាតិស្ករ ដោយគោរពច្បាប់ និងគិ...

AKP ភ្នំពេញ ថ្ងៃទី២៨ ខែតុលា ឆ្នាំ២០២៦ --ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង (ក.គ.ផ.ស.) បានជំរុញឱ្យគ្រប់ភាគីពាក់ព័ន្ធពង្រឹងការទទួលខុសត្រូវក្នុងការផ្សព្វផ្សាយពាណិជ្ជកម្មផលិតផលគ្រឿងស្រវឹង និងភេសជ្ជៈមានជាតិស្ករ ដោយត្រូវគោរពច្បាប់ ក្រមសីលធម៌វិជ្ជាជីវៈ និងគិតគូរដល់ផលប្រយោជន៍សាធារណៈ ដើម្បីចូលរួមការពារ និងលើកកម្ពស់សុខុមាលភាពប្រជាពលរដ្ឋ។ ការលើកឡើងរបស់ឯកឧត្ដមរដ្ឋមន្រ្ដីបែបនេះធ្វើឡើងក្នុងឱកាសអញ្ជើញជាអធិបតីក្នុងពិធីបើក «យុទ្ធនាការឆន្ទៈល្អលើកទី២» ក្រោមប្រធានបទ «បន្តពង្រឹងការអនុវត្តវិធានការចាំបាច់នានាក្នុងការគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង និងភេសជ្ជៈ ដែលមានជាតិស្ករ ដើម្បីលើកកម្ពស់សុខុមាលភាពប្រជាពលរដ្ឋ» នាព្រឹកថ្ងៃទី២៨ ខែតុលា ឆ្នាំ២០២៦ នៅសណ្ឋាគារសុខាភ្នំពេញ។

ក្នុងឱកាសនោះ ឯកឧត្តម នេត្រ ភក្ត្រា បានស្នើឱ្យក្រសួង-ស្ថាប័នពាក់ព័ន្ធ ក្រុមហ៊ុនផលិត អ្នកប្រកបអាជីវកម្ម អ្នកផ្សព្វផ្សាយពាណិជ្ជកម្ម ប្រព័ន្ធផ្សព្វផ្សាយ និងប្រជាពលរដ្ឋ បន្តគាំទ្រ និងចូលរួមអនុវត្តន៍វិធានការពាក់ព័ន្ធដោយស្មារតីទទួលខុសត្រូវខ្ពស់ ដើម្បីធានាថា ខ្លឹមសារពាណិជ្ជកម្មទាក់ទងនឹងផលិតផលទាំងនេះ មានភាពសមស្រប គោរពតាមបទប្បញ្ញត្តិ និងមិនប៉ះពាល់ដល់ផលប្រយោជន៍រួមរបស់សង្គម។

ឯកឧត្ដមរដ្ឋមន្រ្ដីបានលើកឡើងថា យុទ្ធនាការនេះមានគោលបំណងបង្កើនការយល់ដឹង និងជំរុញការចូលរួមដោយស្ម័គ្រចិត្តពីភាគីពាក់ព័ន្ធ ក្នុងការអនុវត្តវិធានការគ្រប់គ្រង ការផ្សព្វផ្សាយពាណិជ្ជកម្មឱ្យកាន់តែមានប្រសិទ្ធភាព។ ទន្ទឹមនេះ ក៏ផ្តោតលើការលើកកម្ពស់ការយកចិត្តទុកដាក់ចំពោះខ្លឹមសារនៃការ ផ្សព្វផ្សាយ និងការបំពេញតួនាទីប្រកបដោយការទទួលខុសត្រូវរបស់អ្នកផលិត អ្នកចែកចាយ និងអ្នកផ្សព្វផ្សាយពាណិជ្ជកម្ម។

សូមជម្រាបជូនថា យុទ្ធនាការនេះ ក៏មានការចូលរួមពីតំណាងក្រសួង-ស្ថាប័នពាក់ព័ន្ធ ក្រុមហ៊ុនផលិត និងចែកចាយផលិតផលគ្រឿងស្រវឹង និងភេសជ្ជៈមានជាតិស្ករ អ្នកប្រកបអាជីវកម្ម សមាគមពាក់ព័ន្ធ សិល្បករ សិល្បការិនី អ្នកផលិតមាតិកា និងអ្នកសារព័ត៌មានជាតិ សរុបប្រមាណ ៥០០នាក់។ តាមរយៈការពង្រឹងកិច្ចសហការរវាងស្ថាប័នរដ្ឋ វិស័យឯកជន និងប្រព័ន្ធផ្សព្វផ្សាយ យុទ្ធនាការនេះ ក៏រំពឹងថា នឹងជួយលើកកម្ពស់ការអនុវត្តច្បាប់ និងបទប្បញ្ញត្តិពាក់ព័ន្ធ ជំរុញការផ្សព្វផ្សាយពាណិជ្ជកម្មប្រកបដោយការទទួលខុសត្រូវ និងបង្កើនការយកចិត្តទុកដាក់ចំពោះការ ការពារសុខភាពសាធារណៈ។

ឯកឧត្តម នេត្រ ភក្ត្រា បានបន្ថែមថា ក្រសួងព័ត៌មានក៏បានជំរុញឱ្យភាគីពាក់ព័ន្ធបន្តអនុវត្តវិធានការនានាឱ្យបានខ្ជាប់ខ្ជួន ដោយចាត់ទុកការផ្សព្វផ្សាយពាណិជ្ជកម្មប្រកបដោយ ការទទួលខុសត្រូវជាកាតព្វកិច្ចរួម ក្នុងការធានាឱ្យការផ្សព្វផ្សាយស្របតាមច្បាប់ និងបម្រើផលប្រយោជន៍សង្គមទាំងមូល៕

ដោយ៖ រិទ្ធី, រូបថត៖ សិរីឧត្ដម