ENGLISH
FRENCH
中文
ARABAKP ភ្នំពេញ ថ្ងៃ២៨ ខែតុលា ឆ្នាំ២០២៦ — សិក្ខាសាលាថ្នាក់ជាតិ ស្តីពីការលើកកម្ពស់ការអនុវត្តសិទ្ធិកុមារនៅប្រទេសកម្ពុជា បានបង្ហាញពីសិទ្ធរបស់កុមារ និងការទទួលរងគ្រោះកុមារ ហើយនិងរួមទាំងរាជរដ្ឋាភិបាលកម្ពុជា ក្នុងការគោរព ការពារ និងបំពេញសិទ្ធិកុមារ ដូចដែលមានចែងក្នុងអនុសញ្ញាស្តីពី សិទ្ធិកុមារ។
ក្នុងអង្គសិក្ខាសាលាដែលប្រារព្ធធ្វើឡើងនៅថ្ងៃទី២៨ ខែតុលា ឆ្នាំ២០២៦ នេះ បានបញ្ជាក់អំពីការតាមដានជាបន្តបន្ទាប់លើវឌ្ឍនភាពនៃការអនុវត្តអនុសាសន៍របស់គណៈកម្មាធិការសិទ្ធិកុមារ ដើម្បីពិនិត្យថា តើអនុសាសន៍នីមួយៗត្រូវបានបម្លែងទៅជាគោលនយោបាយ ច្បាប់ ផែនការ យន្តការ និងសកម្មភាពជាក់ស្តែងកម្រិតណា ព្រមទាំងកំណត់វឌ្ឍនភាព គម្លាត បញ្ហាប្រឈម និងអាទិភាពសម្រាប់ការអនុវត្តបន្ត។
ដោយឡែក ក្នុងរបាយការណ៍ក៏បានបញ្ជាក់ពីសមាគមចលនាកុមារ យុវជនកម្ពុជាដើម្បីសិទ្ធិកុមារ និងបណ្តាញដែលដឹកនាំដោយកុមារ និងយុវជន ដែលបាននិងកំពុងដើរតួនាទីយ៉ាងសំខាន់ក្នុងការជំរុញ តាមដាន និងលើកកម្ពស់ការអនុវត្តសិទ្ធិកុមារនៅកម្ពុជា។ តាមរយៈការចូលរួមរបស់កុមារ និងយុវជន បញ្ហា កង្វល់ បទពិសោធន៍ និងសំណូមពររបស់កុមារ អាចត្រូវបាននាំយកទៅកាន់អ្នកធ្វើគោលនយោបាយ និងអ្នកមានភារកិច្ចពាក់ព័ន្ធ ដើម្បីរួមចំណែកធានាឱ្យការអនុវត្តគោលនយោបាយ និងកម្មវិធីពាក់ព័ន្ធនឹងកុមារ ឆ្លើយតបនឹងតម្រូវការ និងសិទ្ធិរបស់ពួកគេ។
កញ្ញា នាក់ គន្ធា ប្រធានប្រតិបត្តិ នៃសមាគមចលនាកុមារ និងយុវជនកម្ពុជាដើម្បីសិទ្ធិកុមារ និងបណ្តាញដែលដឹកនាំដោយកុមារ និងយុវជនបានលើកឡើងថា ដើម្បីបន្តពិនិត្យ ពិភាក្សា និងតាមដានវឌ្ឍនភាពទៅលើវឌ្ឍនភាពនៃការអនុវត្តសិទ្ធិកុមាររបស់ក្រសួងពាក់ព័ន្ធឆ្លើយតបទៅនឹងអនុ សាសន៍របស់គណៈកម្មាធិកាសិទ្ធិកុមារនៃអង្គការសហប្រជាជាតិ លើរបាយការណ៍លើកទី៤ ដល់លើកទី៦។ លើសពីនេះនឹងបង្កើនឱកាសដល់បណ្តាញកុមារ និងយុវជនក្នុងការជួបសន្ទនាផ្ទាល់ជាមួយអ្នកធ្វើគោលនយោបាយ ដើម្បីឱ្យកុមារ និងយុវជនបានចូលរួមប្រកបដោយអត្ថន័យក្នុងការបង្ហាញកង្វល់ និងសំណូមពរទៅកាន់អ្នកធ្វើគោលនយោបាយ។
ដោយឡែក លោក ហុង រស្មី នាយកប្រចាំប្រទេសរបស់អង្គការ Save The children Cambodia បានឱ្យដឹងថា កុមារមួយចំនួនកំពុងជួបបញ្ហាការរៀនសូត្រ និងកម្លាំងពលកម្ម។ ក្នុងនេះរាប់ទាំងកុមារដែលរស់នៅប្រទសថៃហើយត្រូវបានផ្លាស់មករស់នៅកម្ពុជាវិញ និងក៏ដូចជាកុមារភៀសសឹកដោយសារសង្រ្គាមឈ្លានពានរបស់ប្រទេសថៃកន្លងមកផងដែរ។
លោក ជំទាវ ប៊ូ សោភ័ណ្ឌ អនុរដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងបញ្ជាក់ថា កម្ពុជាផ្តល់សច្ចាប័នលើអនុសញ្ញាអង្គការសហប្រជាជាតិស្តីពីសិទ្ធិកុមារ កាលពីថ្ងៃទី១៥ ខែតុលា ឆ្នាំ១៩៩២។ អស់រយៈពេលជាង ៣០ឆ្នាំ ដែលកម្ពុជាបានប្តេជ្ញាចិត្តក្នុងការគោរព ការពារ និងបំពេញសិទ្ធិកុមារ ដូចដែលមានចែងក្នុងអនុសញ្ញាស្តីពី សិទ្ធិកុមារ។ ជាងនេះទៅទៀត កម្ពុជាបានយកចិត្តទុកដាក់ខ្ពស់ពីសិទ្ធកុមារ និងការពារកុមាររងគ្រោះដោយការរំលោភបំពានដោយប្រការណាមួយថែមទៀត។
គួរបញ្ជាក់ថា ក្នុងសិក្ខាសាលាថ្នាក់ជាតិស្តីពី «ការលើកកម្ពស់ការអនុវត្តសិទ្ធិកុមារនៅប្រទេសកម្ពុជា» នេះ បានផ្តោតលើការធានាឱ្យមានការចូលរួមរបស់កុមារប្រកបដោយអត្ថន័យ ក្នុងការតាមដាន និងលើកកម្ពស់ការអនុវត្តសិទ្ធិកុមារនៅកម្ពុជា៕
ដោយ៖ មករា
