សម្តេចមហាបវរធិបតី៖ ទឹកជំនន់ឆ្នាំនេះធ្វើឱ្យប៉ះពាល់ទៅដល់ ៧ខេត្ត/ក្រុង ក្នុងនោះមានពលរដ្ឋប្រមាណជា ១២ម៉ឺនគ្រួសារបានទទួលរងផលប៉ះពាល់

AKP បាត់ដំបង ថ្ងៃទី៣០ ខែតុលា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសនៃការជួបសំណេះសំណាល ចែកពូជស្រូវ និងស្បៀងជូនប្រជាពលរដ្ឋ ដែលរងផលប៉ះពាល់ដោយសារទឹកជំនន់ទឹកភ្លៀងក្នុងខេត្តបាត់ដំបង ព្រឹកថ្ងៃទី៣០ ខែតុលា ឆ្នាំ២០២៦ មានប្រសាសន៍ថា ឆ្នាំនេះយើងមានបញ្ហាពីរទាក់ទងទៅនឹងទឹកជំនន់នោះគឺទឹកភ្លៀង និងទឹកទន្លេឡើងពេលជាមួយគ្នា ដែលធ្វើឱ្យប៉ះពាល់ទៅដល់ ៧ខេត្ត/ក្រុង ក្នុងនោះមានពលរដ្ឋប្រមាណជា ១២ម៉ឺនគ្រួសារបានទទួលរងផលប៉ះពាល់ ហើយក្នុងចំណោម១២ម៉ឺនគ្រួសារនេះមាននៅខេត្តបាត់ដំបងមានជាង ៦ម៉ឺនគ្រួសារ ដែលមានន័យថា នៅខេត្តបាត់ដំបងមានពលរដ្ឋរងគ្រោះជាង ៥០% បើប្រៀបធៀបនៅទូទាំងប្រទេស។   

សម្តេចធិបតី នាយករដ្ឋមន្ត្រីបានគូសបញ្ជាក់ថា វត្តមានរបស់សម្តេច និងមន្ត្រីអមដំណើរនាពេលនេះគឺ ចង់បង្ហាញអំពីការគិតគូររបស់រាជរដ្ឋាភិបាលនៅគ្រប់ថ្នាក់នៅក្នុងពេលនៃការលំបាក ដោយរាជរដ្ឋាភិបាលអត់ចោលប្រជាពលរដ្ឋសោះហើយ។ សម្តេចបានបន្ថែមថា ក្នុងមួយឆ្នាំនេះ អ្នកព្រំដែនកម្ពុជាថៃ យើងអាចនិយាយបានថាទទួលរងទុក្ខផ្ទួនៗ ចាប់ផ្ដើមពីរឿងការបិទព្រំដែន សង្គ្រាមឈ្លានពានតាមព្រំដែន រហូតមកដល់ទឹកជន់ ប៉ុន្តែទោះជាយ៉ាងណាក៏ដោយសម្តេចសូមធ្វើការកោតសរសើរ និងថ្លែងអំណរគុណចំពោះភាពរឹងមាំរបស់ប្រជាពលរដ្ឋរបស់យើង។ សម្តេចនាយករដ្ឋមន្ត្រីមានប្រសាសន៍ថា សម្តេចធ្លាប់បានជួបជាមួយបងប្អូនប្រជាពលរដ្ឋដែលជាអ្នកបន្ទាយមានជ័យ អ្នកប៉ោយប៉ែតថ្ងៃមុនក្នុងពេលទឹកជំនន់ទោះបីជាឆ្លងកាត់សង្គ្រាម គ្រាប់ប្លោងថ្មីៗនេះ គ្រោះថ្នាក់ទឹកជំនន់ដែលធ្វើឱ្យខូចខាតផ្ទះសម្បែង ខូចខាតដំណាំ ប៉ុន្តែស្មារតីរឹងមាំរបស់ពួកគាត់គឺនៅតែរឹងមាំនៅចំពោះរាល់ការលំបាក ដែលនេះគឺជាចំណុចសំខាន់ ដោយសម្តេចសូមមិននិយាយពីសង្គ្រាមដែលយើងធ្លាប់មានរាប់ទសវត្សរ៍មក គឺប្រមាណជា ៥០០ឆ្នាំនោះទេ។

ដើម្បីឆ្លើយតបទៅនឹងគ្រោះថ្នាក់ផ្សេងៗ សម្តេចធិបតី នាយករដ្ឋមន្ត្រីបានគូសបញ្ជាក់ថា អ្វីដែលយើងអាចធ្វើបាន គឺធ្វើសកម្មភាពជាបន្ទាន់ ដើម្បីជួយប្រជាពលរដ្ឋ ទីមួយគឺជួយជីវិត មិនថាគ្រាប់ប្លោង ឬទឹកជំនន់នោះទេ គឺត្រូវតែរំដោះប្រជាពលរដ្ឋទៅទីកន្លែងមានសុវត្ថិភាព។ សម្តេចបានសម្តែងនូវការសោកស្តាយ ដែលជាអកុសលឆ្នាំនេះនៅខេត្តបាត់ដំបងមានពលរដ្ឋចំនួន ៨នាក់បានស្លាប់ដោយសារលង់ទឹកនិងដោយសារឆក់ខ្សែភ្លើងនៅពេលទឹកលិច សម្តេចសូមចូលរួមមរណទុក្ខចំពោះគ្រួសារសព ប៉ុន្តែទោះជាយ៉ាងណាក៏ដោយយើងបានជួយសង្គ្រោះជីវិតប្រជាពលរដ្ឋយើងរាប់ម៉ឺននាក់  ឬរាប់ពាន់គ្រួសារដែលមកទីទួលសុវត្ថិភាព ថែរក្សាសុខភាព សុខុមាលភាពពេលគាត់នៅកន្លែងទីទួលសុវត្ថិភាព មិនថាមករកកន្លែងសុវត្ថិភាពដោយសារសង្គ្រាម ឬដោយសារទឹកជំនន់នោះទេ ហើយដំណាក់កាលទីបីគឺការស្តារឡើងវិញ៕

ដោយ៖ ចាន់ សុភឿន